女人撐起半邊天，已經係鐵一般嘅事實，地位、經濟同賺錢能力大大提高，收入豐厚咗，咁理財方面係咪又好掂呢？
專出小太空人嘅美國萬通，噚日發佈由中大做嘅「香港女性生活態度及理財習慣」調查報告，開門見山話一眾港女唔夠錢退休，要及早計劃。點計劃？咪用佢哋嘅產品囉！因為萬通嚟緊會專注打港女主意。
份報告話，超過六成港女都自覺經濟獨立，但就嚴重低估退休時所需銀両，例如本來係要500萬，但以為自己儲到250萬就夠，而喺千二個受訪女性之中，有六成除咗強積金之外，係冇做其他投資嘅；以港人條命越嚟越長，退休年齡又提早，情況都幾得人驚，所以美國萬通市務部高級副總裁蕭莉玲猛咁話：「港女儲錢要比港男狠，先至可以過到世！」