大埔吐露港公路貨車猛撼停在路中小巴後撞壆翻側，車上重傷姓文司機及輕傷姓莊妻子，在香港仔中心街市經營菜檔多年，事發時正如常往粉嶺菜市場買菜。「出事時我喺車內瞓着唔知點解會撞車，撞車後我同老公都係清醒嘅，點知佢後嚟傷勢轉差。我個大仔舊年27歲因腳傷細菌感染過咗身，同老公幾經辛苦賣菜供完個細仔喺英國大學畢業，啱啱做保險冇幾耐。老公又傷成咁，菜檔可唔可以做落去都唔知啊！」莊婦經敷藥後已出院，但一臉愁容，既憂心丈夫安危也擔心一家生計。
曾要求司機將車開往路旁的男乘客形容當時險死還生，「兩個司機講數唔夠兩分鐘，架貨車就撞埋嚟，好彩架貨車唔係撞我坐嘅右車尾，如果唔係我就大鑊啦！我擦損小小真係好彩，會去還神同今晚（昨晚）買六合彩金多寶，希望繼續咁好彩啦！」
車廂內眼鏡遍地
對於自己與死神擦身而過他感到幸運，「架貨車一撞埋嚟，我哋㗎小巴好似生死時速咁衝前，有人嚇到大叫，車廂雜物亂飛，一剎那間我哋架車已經喺石壆邊停低。有幾個冇戴安全帶嘅東歪西倒，大部份人有扣安全帶，但由於衝力好猛，有啲位都撞散咗，不過好彩個個傷勢都唔重。」
姓傅男乘客指意外後車廂內眼鏡遍地，「好多乘客都係『四眼仔』，一下猛撞個個跌晒眼鏡，由於事出突然，個個都受傷，加上情況混亂急忙走出車外，大部份人都搵唔番自己嘅眼鏡，我都係『矇查查』咁由救護員送院治理，傷身又要破財配番副眼鏡，真慘情！」
本報記者