十年前，樂評人袁智聰還擁有自己的音樂雜誌《MCB》，回歸後廣告大減他決定停刊，今天他說新一代已經不把音樂當作是消費，本地音樂創作亦越來越保守。不過，他認為十年後唱片舖並不會消失。
「我那一代唔開心會買唱碟；新一代，音樂甚至不是消費。
「我主要仲係聽CD，就算有MP3，鍾意嘅碟都一定要買番唱片，我後面的兩代都會一樣，但再新一代，無經歷過CD，會覺得明明聽歌係唔使錢，你做乜要收我$100？十年後有無唱片舖？我諗仲有。不過一定好少，近年已經唔再會聽到有後生仔話夾錢開唱片舖了。
「Cantopop創作越來越保守。早前與梁翹柏談起，他說替陳奕迅寫的《白玫瑰》本來是主打歌，但唱片公司怕『太新』聽眾不接受。這是一種白色恐怖、自我審查。70年代羅文做《激光中》，唱片公司會把當時最新的東西做主打；80年代我們有達明；五年前我哋都有ThePancakes、LMF這些獨立神話，𠵱家電台尺度都收緊了，十年後悲唔悲？音樂文化係咁，悲㗎！
「有些主流周刊連樂評版都刪去了，無所謂，本來都係寫一二百字。主流傳媒成日覺得介紹音樂會好悶，結果『樂評』變成了『旺角價幾多錢』。如今非法下載對做保守Cantopop打擊其實更大，因為聽眾本來就只係想聽嗰兩首主打歌。
「科技進步，但從前有Limit可能仲好。70年代的Progressive樂手想模仿Jazz，90年代Soundgarden本來係想做LedZeppelin結果變成Grunge。𠵱家啲軟件太易用，結果你想玩乜，最後個Sound都變成一模一樣！」記者：何兆彬
叫袁智聰揀一隻過去十年出品——而肯定到2017年仍然會聽的大碟，佢話好難揀，最後揀咗呢兩隻。
