Richard李澤楷3月成功將旗下嘅盈科保險賣畀外資Fortis富通之後，𠵱家就到咗啲「重臣」起身離開嘅時候。
盈保前日宣佈，執行主席兼董事番薯丸（袁天凡），經已由今個月3號起辭任，CEO陳炳根因健康理由，決定做到出年1月1號亦唔撈嘞，至於唔做執董嘅蘇永雄就繼續做CFO，富通嗰邊就插番自己啲洋人入管理層。
去向成謎
大家比較有興趣係，喺Richard身邊十幾年、有「太傅」之稱嘅番薯丸去向係點？不過暫時真係唔知，因為佢經已冇再喺Richard旗下啲公司有任何title！
只可以講，淨係呢鋪賣盤，番薯丸都有兩億幾落袋，雖然筆錢做唔到啲乜（係佢5月嗰陣自己講㗎！）。
但佢勞碌咗咁多年咪休息吓囉，反正Richard喺3月嗰陣都講過，冇同佢結束賓主關係，盈拓私人公司嗰邊仲有嘢搵佢做緊，之後仲會同佢looking forward好多年……即係仲有唔少大茶飯預埋佢啦，打工打到咁嘅境界真係恨死隔籬！