心血來潮想食薯茸，但市面上一般唔係用薯粉開，就係焗到又亁又燶，睇見都唔開胃！最近終於搵到一間屋苑小食店，不但用新鮮薯仔磨成茸，更配上海鮮、意大利茄醬焗，夠晒誠意做出好味薯茸。原來老闆曾任職高級西餐廳大廚，老闆娘則係餐廳助理經理，家陣夫妻檔，實行以街坊價，喺屋苑推出上等食物同服務。
記者：馮冠芝
攝影：譚盈傑
位於奧海城附近的屋苑小店「薯蓉屋」（Home），開張唔夠2個月，已吸引大批熟客，皆因佢夠平夠正！老闆兼大廚Kelvin之前喺跑馬地一間高級餐廳做咗6年大廚，佢將意大利及法國菜煮法融入薯茸中，並堅持用新鮮食材，菜式即叫即做，咁花時間心機嘅貨色都只賣十幾二十蚊，難怪食飯時間總見店外排晒人龍啦！
意式雜菌薯茸$15
平時見到有「雜菌」的菜式，通常只有用鹹水浸到無晒味道的罐頭蘑菇，但呢度嘅雜菌有齊鮮冬菇、秀珍菇、雞髀菇，名副其實！爽口嘅野菌配上意大利香草茄醬，味道清新又開胃，不經不覺就食晒成份。
忌廉千島醬海鮮薯茸$20
小小薯茸有齊龍脷柳、小蝦、魷魚及蟹柳！龍脷柳醃完再炸，香脆味濃。千島醬汁酸酸哋，中和忌廉的膩感，薯茸吸晒千島醬汁及芝士，味道豐富。
焗南瓜龍脷柳意粉$22
以南瓜磨茸，再加忌廉汁煮意粉，意粉有清甜的南瓜味之餘，更有蒜香牛油味；至於龍脷柳亦惹味香脆，整個菜式滋味又飽肚。
檸檬蜜糖雞翼$18（1客4隻）
除咗拿手整薯仔，當然仲有其他食物至留到客人啦。呢度嘅蜜糖雞翼炸得香脆，再用新鮮青檸、檸檬及蜜糖等製成的醬汁烹調入味，雞翼香甜中帶有少少青檸酸澀味，卜卜脆得嚟又唔會太熱氣。
朱古力慕絲（上）$10
鮮橙果凍慕絲（下）$10
Kelvin話整朱克力慕絲最重要控制溶朱古力的溫度為80℃，這樣才夠滑。記者試食，覺得可可味出得嚟唔太甜，慕絲上的朱古力碎更為整個甜品增添口感。
至於鮮橙果凍慕絲，果凍略酸，奶凍又較膩，是味道很夾的perfectmatch！果凍的清香配合較濃的奶味，吞下後，口腔才慢慢感受到呍呢拿和蛋的香味，口感豐富。
食客評語
「比起薯蓉屋，呢區其他食物實在太難食！我全公司同事都鍾意嚟呢度食，我最愛係碎蛋沙律熱狗。」
「我一星期會嚟3、4次，貪佢又平又正，服務又好！我最鍾意食係肉醬螺絲粉。」
「價錢合理，服務拍得住大商舖！最欣賞佢哋嘅芝士吞拿魚意粉。」
小店故事當客人係仔女
「薯蓉屋」英文名叫「Home」，雖然店內以橘色為主，又有老闆娘阿Ming心愛的貓貓、小蜜蜂擺設，但無奈店內長期開焗爐熱辣辣，9成顧客都係外賣，又何來「家」的舒適感覺呢？
老闆娘阿Ming微笑說，他們要以服務營造家的感覺，只要早一日預訂，就會做出客人想要的菜式。「就好似仔女同阿媽講佢想食咩，阿媽就會煮畀佢食！試過有客人要我煮紅酒燴鵝肝㖭呀！」Kelvin笑言。雖然呢個「阿媽」唔識煮中菜，但𠵱家有6成客人都做咗佢哋「仔女」，鍾意預訂食物，叫得Home，都唔係浪得虛名。
依小記看，Kelvin同阿Ming兩夫婦，放棄高薪厚職，1日13個鐘熬在酷熱的店裏工作，男主廚務女主店面，拍硬檔創事業，呢種感情，也最能發揮Home的精神呢！
薯蓉屋Home（31761177）
地址：旺角富榮花園海庭道41號舖地下
營業時間：11:00am-12:00mn
座位：5至6個（以外賣為主，可先電話落單後取）
