內地乜嘢都有得炒，炒股、炒樓、炒普洱都未夠In，網友edeed喺《天涯社區》留言話：「𠵱家炒股、炒樓太俗，下一步應該炒豬，因為豬肉價格近排係咁升。豬肉本身『滋養臟腑，滑潤肌膚，補中益氣』，家吓仲有得炒，都咪話唔掂，所以豬嘅前景一片光明。」
食得炒得有排升
Windylee007提議：「將喺股市賺到嘅錢，投資買豬，買1000隻豬番嚟擺，等佢哋好似股票咁，升到停板至賣；就算賣唔出都唔使擔心，走去街市執啲爛菜餵佢，連飼料錢都慳番，過一排先再拎去賣。」Daluke就話：「再唔係開個豬場，搞上市，賺得仲勁。」
Edeed都贊成：「專家話豬肉價格嚟緊仲會升，可能持續到年底。」
深綠股民話：「只要啲散戶將炒股嘅一半錢拎出嚟炒豬，包保一個月豬肉價囗升到100蚊一斤。」
國策一變要坐艇
北京老趙提醒：「炒豬唔係話唔得，但都要好似炒股咁睇國策，小心國家突然將『戰略儲備豬』大量推出，隊冧豬肉價，到時短炒變長揸，散戶做埋豬農。」
誠僧亦話：「豬市有風險，炒豬須謹慎。」
香港散戶就冇內地散戶咁有「福氣」喇，可以炒豬，因為喺香港買隻活豬嚟養唔易，要同政府申請攞牌，所以都係叠埋心水專心炒股吧喇！
http://cache.tianya.cn/pub/C/stocks/1/345841.20.shtml
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]