議員S係林風眠專家，一心到香港藝術館睇「清明上河圖」，點知賓客太多，只能匆匆望幾眼，就要趕赴晚間宴會；冇佢在旁指點，左丁山好彩夠運碰上設計名師L，聽佢點評，得益不淺。畫家張擇端極度細心，一筆一畫，絲毫不苟，將北宋京城汴梁（開封）當時汴河漕運嘅人民生活百態，畫得活靈活現，其難處在於畫紙雖然夠長（五公尺），但闊度比較短，在畫紙上畫上人物八百一十四個，船隻二十多艘，樹木一百七十多棵，車二十輛，轎八頂，還有城牆、商店、客棧、虹橋、招牌等等等，內容之豐富，實在驚人，北宋時冇放大鏡，張擇端嘅視力與縝密心思，我哋只能講個服字。
國寶三十二件運來香港，原來由港龍航空包辦，唔怪得國泰總裁陳與港龍總裁鄧非常高興，問總裁鄧如何載運，佢話：「保安非常緊張，不容任何差池，能夠完成任務，可以鬆一口氣，其他唔可以講。」第二批展品在七月二十三號開始展出，睇嚟總裁鄧要緊張多幾個星期。
喜歡書法嘅朋友就高興咯，藝術館展出大師級人物如唐代馮承素（蘭亭序），顏真卿（行書湖州帖），與北宋蘇軾（行書治平帖），黃庭堅（行楷書送四十九姪詩卷），米芾（行書苕溪詩卷），宋徽宗（楷書閏中秋月詩帖頁）……左丁山讀書見過佢哋嘅大名，觀賞佢哋嘅真迹，仲係第一次。
睇完晒，買兩本場刊，留作紀念，畀錢之際，竟然見到耶魯大教授S，佢話放暑假返香港一行，碰上「清明上河圖」展出之機會，當然不可放過。教授S乃本地中學精英，到美國留學，讀完博士學位之後，成為人類學社會學著名教授，其作品為耶魯大學教科書，左丁山去過耶魯，知道S教授咁出名，與有榮焉。
來港展出嘅國寶級文物，第一批於六月二十九日至七月二十二日在尖沙嘴香港藝術館展出，機會難逢，喜歡藝術文物者，不可錯過！