十周年回歸前夕，港股升極都仲有，家吓終於慶祝完，大市噚日升378點，收報22151。不過，無論個市升定跌，總係有人睇好、有人睇淡，網友sfcarson就驚股災好快出現，點解？
97股災仲未驚完
佢話：「記得當年97股災時，除咗股票、樓價不斷被炒起，郵票同其他精品都相繼被炒起，總之乜都炒一餐。當然，隨着股災到臨，所有泡沫都爆破，郵票已經好多年冇俾人炒起喇。」不過，前日佢見報紙報道，最近發行嘅回歸紀念郵票被炒起，「真係不寒而慄。」
johntt亦話：「回想當年認真墟冚，日日見阿爺炒外滙、老竇炒樓、阿嫲炒銀仔、阿媽炒股票，連小朋友都炒郵票、閃卡，直情係全家總動員。」
Coker贈興話：「美國同日本都好快股災，因為iphone同PS3都被炒起。」
恐防同胞煲爆個市
不過，忍俠老苗就認為炒風仲未算好熾熱，「呢套回歸10周年郵票，只有一款被炒起，其餘都冇炒到，各位股民唔使擔心！」
佢仲話嗰款被炒起嘅郵票，係大陸同香港聯合發行嘅「香港回歸祖國10周年」郵票小版張連套折，至於炒嘅亦只限大陸同胞，唔係單靠香港郵票商「煲起」。
其實，邊個驚香港散戶炒「冧」個市啫，家陣可以「煲爆」個市嘅，最大機會都係祖國同胞，大家驚嘅咪就係佢哋一次過炒冧中、港股市囉。
http://www12.discuss.com.hk/viewthread.php?tid=4625155&extra=page%3D6
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]