鍾欣桐（阿嬌）、方力申、黃聖依、田亮、新人孫祖揚及導演劉鎮偉噚日喺長洲為電影《出水芙蓉》進行開鏡儀式，其間忽然落大雨，各人爭相走避。
緋聞男女阿嬌同小方人前人後兩個樣，當記者要求合照時，阿嬌親切地向坐喺樓梯級嘅小方講：「你企起身好喎。」但合照過後，兩人即一左一右閃開，全程背向冇交談。
黃聖依唔驚鬼
小方接受訪問時話兩人喺戲中飾演寃家，至於發展機會要等導演決定。對於會唔會私下約會阿嬌，小方就話：「唔敢，點敢呀！𠵱家長洲咁多狗仔隊。」
有周刊指英皇藝人分黨派，一姐容祖兒為一黨，而Yumiko為另一黨，阿嬌對此話冇聽聞，佢話：「嗰本書講嘅唔好信。」
另外，田亮同黃聖依因工作關係要喺長洲東堤過夜，但就未聽聞鬼怪傳說，黃聖依話：「人正氣就不怕鬼。」她透露正跟經理人兼男友楊子喺北京合組娛樂公司，已跟21名中、港明星簽約。
