本年度抽籤新馬結果宣佈，有人歡喜有人愁，馬主H又試眼光光睇住十幾位老友馬主中籤，自己唔中，冇計。今年馬會以第一時間通知啲有運馬主，馬主N手機響起，一睇，原來係馬會短訊，通知佢中咗。馬主N對馬主H話：「如果你三分鐘之內收唔到馬會短訊，你就係咁先。」馬主H等足五分鐘都唔見電話響，知道又試落空，失望之情，溢於言表。
馬主C係大馬主，年年中籤，非馬主H可比。不過馬主C收到比中籤更好嘅消息，笑容滿面，原來佢位公子喺英國考O-Level（普通程度考試）有九個A，叻過佢當年在英國讀書嗰陣。馬主C話：「香港學生到英國讀中學，一般成績都好好，除咗佢哋生性勤力之外，呢一輩嘅家長之中，唔少曾經留學英國，知道晒考試門徑，老早買定十幾二十年嘅過往考試題目畀仔女操練，操得多，考試有着數，仔女攞九A十A，爸爸媽媽都有功勞㗎！」
不過C太就話仔女考試點叻都係假嘅，出到社會做事，唔識待人處事嘅話，仍然冇用。馬主C話：「考試講技巧嘅，好似我做過幾年某個專業牌照嘅考試專員，負責出題目，出咗幾年之後，都唔知仲有乜新意，偶一不慎，就會出番一啲與舊題目相似嘅試題，畀考生捉到正嘅話，後果難料。出考試題目好辛苦㗎，字字斟酌，出完之後，我自己試答一次，睇吓題目有無漏洞，唔可以太易或太難，花好多時間！」
英國A-Level考試考咗咁多年，考官難免掛一漏萬，曾遭報紙揭發，某些高考數學題係十零年前嘅普通試程度試試題，好不尷尬。香港考試局雖然久唔久就受批評，整體表現仲係好過英國。一位經濟學教授話英國高考攞A，申請佢間大學會當作B，B就當C，以反映兩地程度之差異，左丁山從未考過A-level不敢置評。唔考，一樣入到大學，大學成績亦唔會曳得過中七生。讀四年大學，始終係過癮啲。