夏天天氣炎熱，冇乜胃口，日本人喜歡食冷麵消暑，而且冷得刁鑽，要以山草藥做配料，撈勻食得，搓成麵條又得，最緊要食得健康又心涼；唔鍾意凍冰冰，可以試吓火辣的創意拉麵醒醒胃，越食越辣，越辣就越想食，乜嘢胃口都返晒嚟！
記者：趙珮倩
攝影：陳盛臣
Model：Peggy
日向夏日冷麵$49（b）
湯底汁料以日本當造靚橘子加入醬油、鰹魚熬上7至8小時而成，味道酸甜醒胃，勁清新！配料方面有日式叉燒、蝦、昆布、青瓜、橘子和滷過夜的溏心雞蛋，叉燒雖薄但肉質鬆軟，溏心蛋黃入口即溶，實在令人回味。
涼浸浸山藥冷麵
早前進駐本港的兩間日本過江龍拉麵店「八番拉麵」和「響拉麵」最近齊齊推出兩款藥膳冷麵。咪以為要一塊塊藥材硬啃喎，山藥幾乎唔使咬就吞得。原來所謂的山藥原名薯蕷，屬於纏綫草質藤本植物，一般在秋冬挖取根莖，洗淨刮皮，反覆用硫磺熏後曬亁，再用木板搓成圓柱形切段，再曬亁成為山藥。據《本草綱目》記載，它有補中益氣、強筋健脾之效；而日本有研究發現，其碳水化物分解酵素，能促進新陳代謝、預防高血壓及通便。咁有益，日本人就諗到將山藥用機器加工十幾小時，整成白雪雪滑不溜口的黏狀，再拌冷麵進食，健康消暑。
另一款藥膳冷麵以菊科草本植物艾蒿提煉的青蒿素加入麵粉打成拉麵。據講青蒿素能殺死癌細胞㗎。
山藥冷麵$48（b）
一個字講晒─滑！十足蛋白咁，細嚼下才感受到粒粒粉狀物體，味道淡薄唔覺有草藥味，要與冷麵、葱、紫菜和木魚汁撈勻黏在一起，又凍又滑，囗囗聲滑入口好過癮。
艾蒿冷麵$45（a）
吃時略浸木魚汁，依然食到輕微草藥味，個人覺得似葛菜，加埋白芝麻香勁夾，麵身煙韌耐嚼，口感十足。
日本人食客有say
熱辣辣創意Fusion拉麵
最近銅鑼灣波斯富街又開多咗一間樓上Cafe──「囗囗拉麵」，聽個名就知有創意，主攻創意Fusion拉麵，而每款拉麵的湯底都不含味精，仲有8款口味任揀：味噌、醬油、特濃豬骨、地獄、冬蔭功、沙嗲、鮮番茄或咖喱，就算唔食得辣都仲有大把選擇。
口水手撕雞撈一丁$48（c）
衰貪心，一次過倒晒另上的秘製麻辣汁撈丁，麵條索晒啲汁勁嗆喉，食到標汗，真係好辣！好彩手撕雞未撈到辣汁，仲食到鮮雞味。
葡式非洲雞湯拉麵$48（c）
雞扒以8種香料醃製24小時，煎香食好惹味，亦夠晒入味。怕地獄湯底辣得滯?有豬骨湯味，味濃而不膩，唔係一味得個辣字。
流沙豬扒湯拉麵$48（c）
咬開厚厚的肉眼吉列豬扒，皮脆肉嫩，最重要係即爆澎湃的芝士漿，冇誇張真係有流沙效果。湯底我揀咗中辣程度的冬蔭功湯，好濃的香茅味，酸辣味適中，拍得住正宗泰菜餐館。
食客有say
食店資料：
（a）8番拉麵（36203245）
地址：九龍灣megaBOX10樓3號店
（b）響拉麵（22709851）
地址：尖沙嘴海港城3樓city'super美食廣場3001店
（c）囗囗拉麵（25777445）
地址：銅鑼灣波斯富街83號波斯富大廈1樓A室
