花旗前晚大幅上升，帶挈港股以新高指數慶賀回歸10年，喺大隻國企股支持下，港股昨日升得好有氣勢，雖然成交略為奀咗啲，但仲有817億，股民啱啱放完假，算係咁㗎嘞。
花旗利率唔想升又唔想跌，美元梗係俾人質，金價同金屬價格都炒起，紐約期油升破70美元1桶，呢個禮拜會炒啲乜嘢，大家應該有啲頭緒。
隻滙控（005）唔得，大戶就揀咗隻中移動（941）做龍頭，升3.4巴仙，創86.80元收市新高，睇個勢仲有得去。其他郁個市上去嘅股份，都係啲國企兼恒指成份股，最搶眼嘅就係當炒嘅油股中海油（883）。
中海油C輪3435：中海油早排升到9.48元就跌番轉頭，調整咗1個禮拜之後，喺條20日線上面搞咗個「早晨之星」出嚟，升破10日線，放完假返嚟就龍精虎猛，昨日成支大陽燭扯高，睇嚟好快試10元，破位就睇11元，可以買啲中海油C輪3435，隻輪昨收1.44元，槓桿率6.4倍（有效5.4倍），正股升上10元同11元，3435應該喺2.10元同3.05元樓上，正股跌穿8.80元止蝕。