由細到大老師同父母都教，每人平均每日要瞓8個鐘先至健康，不過做藝人又邊有咁多時間休息吖？唔養出一對黑眼圈算執到，最近有網友就上載咗幾位韓星嘅瞓覺樣，見到佢哋好努力爭取每分每秒休息，都幾搞笑。
fans照讚可愛
譬如趙寅成都幾離譜，佢出席頒獎禮時都可以瞌眼瞓，實在嚇阿Net一跳，唔通當日佢打定輸數冇獎攞？不過fans見佢個惺忪睡眼樣，又猛咁讚佢可愛，冇計啦，靚仔做乜都有人讚㗎啦！仲有，好似即將進軍美國市場嘅SE7EN，休息時間自然少啦，但始終要扮靚見人，剪頭髮閒閒哋都要坐粒幾鐘，但係瞓到成隻死豬咁，都幾誇張。
宋慧喬瞓得靚
至於好似文根英咁趴喺課室枱度休息，相信大家喺學生時代都做過，再次證明藝人鏡頭之下都係普通人一個。李準基未埋位拍戲前稍作休息，都係想話畀人聽佢忙到連休息時間都冇，工作好疲勞啫，仲有新偶像鄭一宇坐車時瞓到擘大晒個口。網站同時又上載咗宋慧喬同金泰希嘅瞓覺樣，不過瞓得咁有儀態，阿Net都唔知佢哋係咪真係瞓着。
眼瞓韓星網址：
http://kr.news.yahoo.com/service/news/shellview.htm?articleid=20070628094000146d9
版主：阿Net
本欄逢周一至五刊出