又有本港上市公司進軍越南，金源米業（677）宣佈，與越南地方政府簽訂諒解備忘錄，同意在越南建造、營運及轉交3個基建項目，分別涉及造橋、河道工程及建造公路。以上合作方式等於傳統基建項目嘅BOT合作形式，莫非金源想轉型做基建股？
金源米業主業為涉及食米之入口、批發、精細加工及包裝等，亦有從事證券及物業投資，年報顯示公司財政相當充裕，有現金2.2億元及無負債，雖然如此，要涉足基建行業，資金需求同本業有好大分別。事實上金源份通告亦都話明，建議一旦落實，項目規模相對於公司總資產及市值都會相當龐大，並會成為公司新增的主要業務。
本港上市基建股幾乎全部都有一定規模，中交（1800）、長建（1038）市值分別都超過600億元，規模較細的合和（054）都有近300億元，以金源昨市值8.7億元來比較，的確完全無得比。
另一方面，今時今日嘅越南政府之所以會同金源簽約，應該會有一定把握，除咗係有一定財政實力作後盾，話唔定會有其他合作夥伴，所以亦不宜一口咬定呢項投資無得做，相信要等下一份通告，有詳細條款嘅時候，至可以分析得到。
高速傳動不宜高追
中國高速傳動（658）有大行保薦加上大孖沙入股，錄得近700倍超購，一手中簽率只得一成，之不過暗盤價「只升」35%，不及傳聞中升50%，即使暗盤價計，其預測今年PE仍高達53倍。所謂傳動，確實講緊係做齒輪，除咗風力發電機，仲有建材、船用以及通用齒輪，睇好機械設備股，寧取增長穩定兼平得多嘅上海集優（2345）。