今日，孫柏文又挺曾。
上個禮拜，我用兩篇文章話過，我非常認同特首曾蔭權，走出嚟話要將特區打造成千萬人城市。問題只係畀啲乜嘢人嚟香港。
我又曾經話過，我最想見到嚟港嘅移民，就係年輕版，「三冇」嘅李嘉誠同黎智英。佢哋當時窮到燶，讀書少，嚟港嘅一刻，連未來想做邊行，會走邊條路都唔知，所以就係「三冇」，冇錢、冇學位、冇方向。
不過佢哋就有一樣好重要嘅嘢，就係「飢餓」hunger，佢哋就係「好飢餓」hungry嘅人，對機會「好飢餓」，對知識「好飢餓」，對向上爬「好飢餓」。所以就算冇錢、冇學位、冇方向，就係過百萬個呢啲咁嘅移民，喺獅子山下將香港打造成一個神話。
政府可以成功甄選呢啲「三冇」移民嘅政策，就係憑當年嘅「抵壘政策」。「抵壘政策」好簡單，就係只要你能夠憑聰明才智或者超卓體能，能夠繞過政府嘅障礙，成功到達市區，就可以攞身份證，融入社會。即「抵壘政策」係一個港英政府提供畀想嚟港工作、生活嘅人，24小時隨時可以考嘅「移民試」。
咁今時今日兩個最大主流移民方案，就係「投資移民」同「技術移民」。如果要用幾百萬先至可以嚟港，窮到燶嘅年輕版嘅李嘉誠同黎智英嚟唔嚟到？所以支持「投資移民」嘅人，正硬膠。
隨時資源錯配
講「技術移民」。雖然，就連我非常仰慕嘅左丁山叔叔，都話人口「貴精不貴多」，如果只吸引「低教育，低技能」嘅人，只會益咗陳婉嫻、李卓人攞多啲選票，令政府福利支出大增。不過如果左丁山叔叔有留意，上個禮拜就有班「好高教育，好高技能」嘅醫生、社工，出嚟要求政府增大支出畀佢哋。所以高技能都可以冇用。不過如果換轉係年輕版「好飢餓」嘅李嘉誠同黎智英，薪金太低？一早已經學新技能轉工啦！
仲有，如果六七十年代政府係用計分制度吸引「高技術」移民。今時今日香港一定有全世界啲最優秀嘅黐膠花工人，有個「黐膠花」立法會功能組別，跟住黐膠花聯會就會「好愛國」，日日要求政府資助式微嘅黐膠花行業。所以，支持「技術移民」，不如支持「好飢餓」嘅移民。
最近聽聞我哋特區有個「專才」入口計劃。嚟港嘅要求，就係到埗前要有份工喺手。你話年輕版嘅李嘉誠同黎智英，有冇工喺手先嚟？毋須靠我哋血汗錢開飯，可能投靠朋友、親戚嘅外來後生仔女嚟港，就不如畀個機會，畀啲時間佢哋摸清楚特區環境，跟住就唔好阻住佢哋開工。唔係好似「專才」計劃咁，人生路不熟，已經要有份工喺手，分分鐘資源錯配，浪費大家時間。
其實，我哋可以用經濟學，去設計一個「人道版抵壘政策」。毋須強迫想嚟港嘅人犯法、同鯊魚共舞，都可以甄選出「好飢餓」嘅移民。我叫呢個政策做「三冇」按金政策。今晚8:30pm喺有線財經08台，公之於世！
金手指網誌： http://phatdat.blogspot.com