噚日第一日返工做財經事務及庫務局局長嘅陳家強（圖後排右三），已經好落力做好佢份工，噚日孖住港交所CEO周文耀（前排右），同俄羅斯及東歐主要證券交易所（MICEX）簽咗份諒解備忘錄，日後港俄兩地交易所會更緊密咁將市場訊息互換，推廣企業喺兩地上市等，MICEX由俄羅斯聯邦駐港總領事館總領事謝爾蓋．格里蔡做代表。
另一邊，作為第一個同香港結盟嘅海外交易所納斯達克，好識做咁送份賀禮畀香港慶祝回歸，喺七一之後第一個交易日（2號），搵香港駐美國總經濟貿易專員方舜文主持開市儀式，有得去納斯達克交易所個圓形大廳敲鐘，方舜文同一眾中美嘉賓都表現得好興奮。