好多人去旅行，都有打算自己租架車揸住周圍去，如果我去台灣的話，更加要一試今年初才通車嘅台灣子彈火車──台灣高鐵，80分鐘就可以玩轉台北到高雄，慳時間又方便。心急嘅話留意PS3即將推出呢隻《Railfan》，除咗可以親身駕駛呢款新型火車，遊戲更附有旅遊指南，用來計劃行程啱晒！
記者：許福合 攝影：陳偉強
記者試評：車長唔易做！
高鐵雖然話係台版子彈火車，不過對遊客、鐵路迷都好有新鮮感，想認識多啲，遊戲內就附有詳細介紹，而一般人最有興趣都係「高鐵有幾快？」《Railfan》內你就可以親身一試，望住畫面，可以感覺到由靜止加速到最高300公里嘅快感。
不過玩落我有啲唔習慣，因為以前《電車Go》，一般都只有6、7段變速，而高鐵會分成13段變速操作，難度真係提高咗唔少。我試過幾次都係衝過站停唔住，所以話做高鐵車長絕對唔容易！玩落最令我覺得過癮之處，係高鐵行走聲音、鳴笛及列車廣播都係原汁原味咁收錄在內，所以經常會聽到國語廣播，玩慣日系遊戲真係有啲唔習慣。
官方出手畫面跟足
鐵路遊戲最出名當然係《電車Go》系列，不過從來都以日本鐵路做背景，講真，日本鐵路雖然發達，不過好多車款已經好舊。今次PS3推出《Railfan》就選中剛通車的台灣高鐵作為模擬駕駛嘅對象，自然令一班鐵路迷流晒口水，等住要玩！
好彩遊戲開發得到台灣高鐵公司協助，無論車身到駕駛室都照足真實設計，加埋高鐵南北沿線700公里風景都收錄在內，再以畫面靚見稱嘅PS3配合1080p輸出高清畫面。當我揸住手掣，就好似置身高鐵車廂內一樣，外面風景、人車走動都可以見到，真實感比CG動畫強得多。
埋站時間也真實
除咗畫面夠真，連時間感都夠真實，由一個車站到下一個站，遊戲時間竟然亦要5、6分鐘以上，雖然兩邊有風景睇，不過睇得多都有啲悶，都係趁呢個時間計劃吓景點行程仲好。
Profile
主機：PS3
開發：音樂館
類型：模擬
人數：1人
發售日期：7月12日
售價：未定
查詢：23452966
