AC米蘭前鋒「大哨」朗拿度返巴西唞咗一排暑，我求大俠前日打電話畀佢，點知傳來急促呼吸聲，當堂嚇一跳，佢即刻解釋話自己啱啱操練完啫！
我求大俠初時都唔信，因為上個禮拜朗拿度先同囝囝朗拿德以及新女友瑪麗亞（小圖），喺里約熱內盧沙灘玩風箏，成個幸福3人小家庭咁！又點會放棄家庭樂自動自覺操練呢？不過講真當時睇到佢嘅豐腰盛臀，都幾擔心佢來季嘅狀態。
女友到訓練營打氣
「大哨」講話AC日前派咗米蘭實驗室高層般奴同體能專家丹尼爾到巴西，制定每日3個鐘訓練，幫佢減肥keep狀態。前日下午兩點半，黃衣藍褲嘅「大哨」喺當地訓練營做沙地衝刺跑，瑪麗亞就喺場邊打氣。聽「大哨」講成個特訓計劃為期7日，7月中就會飛返意大利備戰新球季。講真，我求大俠從佢加盟AC開始覺得「大哨」越變越好，今次暑假都接受特訓就夠晒生性啦！希望佢來季能夠重返高峯，為球隊贏多幾個冠軍。
米蘭實驗室夠專業
呢次特訓事件亦睇到AC點解會咁成功。巴西球員回國度假出名玩得夠爛夠情色，好似之前阿祖安奴就係例子；不過AC就唔會採取放縱政策，仲派埋體能專家過去幫佢操，真係夠晒專業喇！
所以話呢，大家千祈唔好笑AC係老人院，因為米蘭實驗室可以幫所有球員操到fit一fit，咁樣，冠軍自然就手到拿來啦！
逢周一至五見報