勤＋緣再下一城，啱啱攞埋重慶電視台娛樂頻道嘅獨家廣告代理權，事頭婆梁鳳儀忙到開巷，理應唞多啲再搏殺，點知佢爆畀華華知，每日瞓四粒鐘已夠數，剩番咁多時間做乜？
佢話經常喺夜晚搵資深傳媒人梁李少霞等雀友大戰四方城，每鋪幾百蚊上落過吓手癮，玩足兩粒鐘，之後再煲番齣戲味勁濃嘅粵語殘片，先肯乖乖覺覺豬。
梁鳳儀仲話，佢打親牌都好難專心，有時一路摸牌一路度橋，甚至同生意夥伴傾交易條件（三更半夜傾？），華華聽到寫個服字。佢解釋，每張合約傾到臨尾嗰陣，都要搞幾粒鐘，咁嘥時間，不如甩吓牌好過。
佢咁一心萬用，竟然仲可以喺開枱初段食過幾次十三么；之不過，啲生意傾到埋尾嗰陣，大牌就多數食唔出兼要出銃㖭，咁高章？信不信由你！