啱啱過咗嗰個長周末，一行人話就話去探吓股王A，實際上係想喺佢屋企個無敵會所BBQ。雖然回歸假期港股休市，但去到股王A屋企，仲見佢埋頭研究緊股市。
股王A：「敏妮，前幾日睇大陸網，見到國家將會發行特別國債，加埋QDII同紅籌回歸，呢三招喺大陸叫『組合拳』，相信A股有一段時間冇運行喇！」
組合拳互補長短
敏妮都有睇過相關嘅報道，由於資金大量流入，大陸為免谷爆股市，所以出招排洪。之前A股狂升，就加印花稅，結果A股係就係應聲大跌，出現小股災，但冇耐就再升過。其實從古至今，大陸經常洪水為患，所以講到點「治水」，中國人喺國際上都可以稱得上數一數二。
之前敏妮都講過，中國人醫病用嘅係王道方法，講求治本清源，所以首先要搵病症嘅根本。喺大陸領導人眼中，大陸股市唔係有泡沫，預測市盈率去到幾十倍咁高，只係供求失衡，市場上想買股票嘅人太多，但流通嘅股票就太少，導致股票越炒越高；散戶見咁嘅情況就更加想搶，手頭唔夠錢就去借。
三招組合拳就係睇準呢啲致命傷，逐一醫治，互相配合又互補長短。首先要醫供求失衡，第一招就係QDII，鼓勵民間資本走出去，投資境外市場，達到「泄洪」目的。資金流出嚟港股，對港股當然有利，仲唔怕谷爆，因為港股係一個國際化嘅成熟市場，有良好調節機制，莫講話30倍市盈率，隻股賺10倍，敏妮肯定你晨早已經沽咗套現，仲等咩！
國債抽亁銀行血
第二招「截流」，加快紅籌回歸A股市場，呢招就係醫唔夠流通股票嘅症狀，與其益人，不如益自己。
至於第三招、亦係股王A認為A股冇運行嘅致命一招，就係「抽血」。之前財政部發行1.5萬億人民幣巨額特別國債，用嚟買2000億美元外滙儲備。散戶借錢炒股，大陸政府嚟一招雞仔唔管管麻鷹，抽亁銀行啲血，等佢哋冇咁易借錢畀人。
由於特別國債係分期發行，加上抽走嘅資金規模龐大，你可以當成一個大水霸，財政部每次見股市嘅「水位」太高，㩒吓個制就開閘放水，每次講緊係幾千億人仔。
試諗吓，有呢個水霸喺度，個市一升政府就㩒制放水，咁仲升得去邊！
http://manlitalk.com/blogs/