人物：宮雪花
時間：1995年6月
地點：香港
經過：朱玲玲係香港人公認嘅選美冠軍，但講到最哄動嘅一次選美，實非95年嗰屆亞洲小姐競選莫屬，當年亞視搞噱頭同玩突破，歡迎任何年齡女性參選，結果當年以47歲參選嘅宮雪花，因為身材同樣貌都唔輸蝕畀班後生女而成為風頭躉；至於同屆年紀最細係15歲嘅陶安仁，佢哋一老一嫩好似兩母女一齊參加選美，真係相當搞笑。
自信心爆棚嘅宮雪花做咗風頭躉，但亦因為咁而樹大招風，喺95年6月，佢被踢爆結過婚兼生咗兩個仔，虛報資料同違反亞姐選美規例，又傳佢曾經整過容等，但宮雪花一概唔認，話自己失憶乜都唔記得，真係令人佩服到五體投地，至於亞視亦唔想冇咗花姨呢個咁有話題性嘅候選佳麗，所以懶得深入調查真真假假。
結果，花姨敗於冠軍楊恭如之下，只係得到第五名同一個由新聞界選出嘅最受傳媒關注獎，而亞軍同季軍就分別係黎淑賢同黎思嘉。一直唔認結婚生仔嘅花姨，98年5月接受訪問時，終於承認自己係兩子之母，而佢個仔江澤龍05年仲參加無綫「香港先生」競選，可惜同佢阿媽一樣落敗收場。
本欄逢周一至周六刊出