靜咗一排嘅數碼通噚日又有動作，「領先」業界推出手機上網服務，CEO黎大鈞話，呢個畀客戶即時瀏覽網頁同收睇互聯網短片嘅新服務，係數記同中文大學合作研發，花咗3年時間，使咗差唔多1000萬。
上網乜都有得睇
呢個新服務至平28蚊有得用，無限上網都只係108蚊…黎總冇講話target要上幾多客，只係話佢哋啲服務係好過其他人，因為人哋嗰啲速度慢又容易資料外洩喎。
佢又話，因為臨近業績（查實仲有成個幾月）所以乜數都唔講得，只係靜靜雞話：「上半年唔止係咁嘅！」
咁佢對家一個有i-Mode，一個播英超聯，數記「劣」唔「劣」？黎總話，𠵱家互聯網咁多內容，上網乜都有得睇，用高價買內容嗰啲係儍同戇居嘅…唔知買咗獨家content嘅又點睇呢？