「國之重寶」在香港藝術館展出，重中之重嘅國寶當然就係北宋張擇端嘅「清明上河圖」，吸引大量觀眾。
如此國寶，因慶祝香港回歸十周年，北京故宮博物院先至肯借出展覽，平時喺北京故宮都冇得睇。為表隆重，曾特首與高祀仁與北京故宮館長，民政事務局局長何志平與贊助人滙豐代表王冬勝、利定昌夫人等等一齊主持開幕儀式。參加嘅賓客就多咯，一時之間講唔晒，左丁山係門外漢，唔識咁多藝術文化，立即閃埋議員S、退休大學校長C、畫廊名家T等人身邊，預備隨時請教。
儀式過後，曾特首等大人物當然上二樓睇咗先，我哋企在電梯旁，一於死等，卒之企到腳軟，一位富有人家話要走先：旁人捉住佢唔畀走，話機會難逢，以後未必有得睇，富翁於是與我哋一齊罰企。左丁山趁機會向名家T請教：「清明上河圖係無價寶，其他展出物品亦係價值連城，唔敢向你請教價錢。近日有一幅甚麼『盛世明珠』出台，有報紙話值八千萬元，值唔值呀？」名家T一面不屑之色咁話：「我唔識庸俗嘢！」
好嘞，卒之輪到，一眾議員、校長、秘書長、文化界要人一擁而上，走入西館爭看「清明上河圖」，點知人人行錯方向，本來應該行順時針方向，最後先至行到收藏真迹嘅玻璃櫃嘅，但眾人全部行晒逆時針，於是塞在玻璃櫃前，行頭之人睇到入晒神，唔肯行開，議員C、議員L與左丁山又試罰企，大顧問L教授望吓個錶，唔等咯，要趕下一場，首先撤退。不過以佢嘅身份，應該可以隨時再嚟睇過。係咁等，唔係辦法，左丁山索性走番順時針，大廳內有好清晰嘅複製品，中英文說明介紹「清明上河圖」，名家T大為讚賞：「台北故宮博物院有明朝仇英臨摹嘅『清明上河圖』，啲介紹說明寫得冇香港咁好，香港藝術館做得好有心機！」睇完複製品與說明，對呢幅國寶有概括性嘅認識，立即走番去真迹玻璃櫃，人龍已經縮短好多，設計名師L正在排隊，捉住左丁山傾偈。十分鐘後，輪到我哋嘞，設計師低頭一望，驚呼：「不虛此行，好好好！」