「如果夏娃唔咬蘋果就冇是非，冇是非就冇新聞。」這是我們老闆黎智英的創報名言，結果伊甸園的禁果將罪帶來了世界，《蘋果日報》像打開了潘朵拉的盒子，令香港報壇掀起了一場革命性的改變。「蘋果文化」在過去12年影響深遠，年輕一代甚至飲蘋果奶水大！前壹傳媒記者遍佈各大媒體，刺激、淺薄、誇張、失實、攝影新聞學、動漫新聞科……四處開花結果，整個香港傳媒都「蘋果化」了，爭相拍裙底、起人底，但絕艷露底還只有正牌《蘋果》做得到！
記者：馮敏兒 攝影：梁細權、譚盈傑、馮敏兒
模特兒：SherryMan
鳴謝：breadnbutter
文化藝術界 齊撐「賜我力量！」
不要以為文化界和藝術家唔鍾意《蘋果》，其實12年後的今天重看，大家才發現《蘋果》其實幾好，無時無刻充滿力量，甚至有種末世的最後希望！
好蠱惑仔
純文學雜誌《字花》編輯鄧小樺認為：「《蘋果》彷彿同『滔天蓋地』四字是相連，令人想起力量、撐、蠱惑仔，但卻有一種民粹、浮躁、淺薄。《蘋果》總是把我逼到一個臨界點上，要我自問是否要吸引更多人嘅注意，如果要，就得用一種『蘋果式』嘅方法!咁究竟我要唔要？如何控制？又作多少犧牲？」
明刀明槍唔怕得罪
「鄧小樺說出了典型的文化人觀點，唔想出賣自己。」嶺南大學文化研究系副教授游靜則認為：「《蘋果》正正挑戰着你可以有幾市場化？在《蘋果》面世時我的確擔心被過濾，但時至今日嘅傳媒生態，其實每一張報紙嘅『過濾網』都好大，以我讀報20多年嘅經驗，其程度喺香港歷史上從未見過，所以《蘋果》嘅過濾網反而變得非常珍貴，因為佢『明刀明槍』，你完全知道遊戲規則，只在乎你玩唔玩，相對其他所謂中產階級、知識分子嘅報紙就好『隨機』！
「《蘋果》有趣嘅地方，正正就是它暴露了香港中產階級文化中嘅虛偽性。10年前我哋會鬧《蘋果》係一份冇原則嘅報紙，為咗市場乜都做，新聞煽情、老作，但今日，所有其他大部份嘅報紙一樣老作，所以《蘋果》反而係對抱有介入社會企圖嘅知識分子嘅寶貴渠道。」
黎智英焗住要砌齊抗言論淨化
鄧小樺搭嘴：「《蘋果》好寶貴，作為大主流，𠵱家見到佢被迫至邊緣，黎智英焗住出嚟砌，實在好開心！」游靜續說：「更重要是，社會正經歷一次言論淨化嘅過程，而且係通過道德外衣嚟淨化，但《蘋果》由始至終就話：『我係唔道德㗎喇！』所以佢容許整版講風月色情，一整個壹傳媒狂砌明光社，喺其他嘅報紙，同樣嘅論述肯定唔出得。」
萬世歌王詹瑞文：我抄
聽到雙妹的滿腔熱血，詹瑞文就現實得多：「我好多橋得自《蘋果》，係肯定嘅事實！」詹瑞文不打自招，但他認為《蘋果》是「搞亂檔」，「雖是垃圾報，但當我哋話港人文化水平低落時，總要多謝《蘋果》。佢已變成香港文化，反映社會潮流帶動香港思維，如電視文化一樣。《蘋果》是種標題文化，所以能量好大，作為一個文化工作者，你亦一定要買嚟睇，你要知道喺每件社會大議題上，《蘋果》站在甚麼立場，一般報紙要中立，但《蘋果》就好有態度，結果變成份份報紙都好有自己嘅態度！或者世界變了，這才是TrueVoice吧！」
反對派句句恐嚇：新聞界危機處處
有人睇好有人睇淡，狂批：「《蘋果》是商品，香港人興趣就是《蘋果》的興趣，但今天《蘋果》也要順應民情，面對中港融洽的難題，而且免費報紙的打擊都幾大……大家便無以為繼，連以往帶頭的《蘋果》都自身難保！」
「無冕皇帝」死了 學生唔讀新聞系
嚇死人的言論出自《蘋果掉下來》一書作者兼中文大學新聞與傳播學院導師梁麗娟，她說《蘋果》對她的學生影響最大：「佢哋對嚴肅嘅新聞已經冇晒興趣，喺蘋果化後成長嘅一代，對娛樂性、八卦嘅興趣極大，但一涉及政策分析，同學就全部啞口無言，有同學甚至覺得：『如果新聞只係娛樂化嘅新聞，咁我為乜讀新聞系？』『無冕皇帝』神話破滅，整個新聞業在社會地位上所受到嘅衝擊巨大！記者對民主自由是一個很重要的把關人，注意力如果一旦只關心《溏心風暴》就麻煩！《蘋果》『飲鴆止渴』，報業好口渴，文字面對嘅壓力很大！」不過最後《蘋果》還是進步的，她指五年一次中大做的報紙公信力調查，所有報紙都跌，獨《蘋果》一紙上升。
局中人語：「蘋果黨」暗渡陳倉？
不過我們幾位新聞系青春女記者同事，一邊同意亦一邊快快樂樂地工作，中大新聞系畢業的Linda爆料：「我哋年年交嘅功課都關於《蘋果》文化，因大家都知有大把題目可以討論，狗仔隊、嘩眾取寵……未識字之前，佢嘅排版的確好吸引！呢間公司都好信任記者，記者自主都唔錯！《蘋果》角色似政黨，7.1佢有份推動。」我這位同事的言論出位事小，小弟都入埋「蘋果黨」事大！
浸記新聞系畢業的蘋果記者Twinnie則反駁：「我份份報紙都會睇，唔覺得自己唔識做政治分析。」但她聽到睇《蘋果》有「身份認同」就哈哈大笑，「年輕一代唔睇《東方》，副刊當然要雜誌化，做靚靚見人，但港聞有自己嘅角色，頭條更應該多多字。」我結論是做「反對黨」一定有市場。
消費者小圈子代表
麥sir：黎智英你知錯未？
前小童群益會幹事，現網上71人民電台（www.radio71.hk）節目《智取太平山》主持麥Sir是忠實「蘋果人」：「12年來我屋企門口每朝7點都有一份《蘋果》，去旅行回來亦一定全部掃描一次，記得當時好興跳樓實錄，作大誇張嘅標題，語不驚人死不休，令人不安，我試過寫信給羅燦大罵：『你咁嘅封面令人惡心！』黎智英竟親自回覆：『我們知錯了！』哈哈哈！這可是黎先生十年來冇變過嘅，可以不斷認錯，但結果係照做！」
彭志銘：肥佬黎是政客！
次文化堂社長彭志銘：「香港應該有份反對報，立論有冇偏頗唔重要，尤其係喺一個全盤偏側嘅環境上。今時今日嘅黎智英，已經唔係一個傳媒大亨，透過《蘋果》你見到佢係一個政治人物。」
天星醉畫家：我欣賞！
天星碼頭長駐街頭畫家侯戈奇：「全世界名人我畫了三百幾個，正尋找黎智英嘅一張相為佢畫像。我雖然唔同意肥佬黎嘅立場，但佢敢作敢言，我欣賞！」
餐廳侍應：命運還是愛情？
「蘋果人」餐廳女侍應阿芳，愛情選她看《蘋果》：「我以前睇《東方》，但幾年前因為老公轉睇《蘋果》，我都覺得幾好睇，潮流版有時仲OK過雜誌。都習慣咗唔會睇番《東方》，《太陽》更一定唔睇。但工作忙時就乜報都唔睇！」
創刊時，老闆黎智英以「萬箭穿心」上陣宣傳，12年後死性不改，可能是香港最有名「自我實現」的預言。
「蘋」地一聲
1995年6月20日
創刊報顛覆版面，採全彩印刷。
1997年2月21日
《蘋果》頭條刊出鄧小平死前最後遺容，當時都算是超級國家機密了。
1997年4月22日
解放軍過邊境進駐香港，《蘋果》當佢冇到，反而將新馬仔家族爭產案搬上頭條，開娛樂新聞上頭條，港聞娛樂化先河。
2003年5月2日
台灣《蘋果》面世，即顛覆了台灣報業，重演了在香港發生的事情，而且空前成功，日銷50萬份，肥佬黎半年歸本。
