滙豐亞太接連喺一個月內，有兩名高層辭職，繼亞太區總裁兼行政總裁邵銘高，上月中突然劈炮，過檔澳紐銀行集團後，滙豐噚日又發出內部通傳，指擔任投資銀行亞太區主管嘅StevenWallace，亦喺今個禮拜唔撈。據聞佢老哥跳槽花旗，而原來喺滙豐個位，就由集團駐新加坡高層張道誠代替。
建銀亞洲新馬上任
獅子行一直最自豪嘅，就係團隊文化，高層一做幾十年，從來都以忠於「六角形」（滙控徽號）為榮，但時移世易，自邵銘高一走激起漣漪後，傳統銀行業務嘅老細都可以被同行撬走，咁向來車輪戰嘅投行，就更不在話下。
現年40歲嘅Wallace，係滙豐企業銀行、投資銀行、資本市場（CIBM）前聯席主管司徒紹基麾下猛將，將軍既去（司徒氏早已離職），有部下唔撈，都係遲早嘅事。唔知啲證券行，呢次又會點樣分析滙豐人才流失嘅效應？
順帶一提，早前遞信話會離開效力咗12年嘅建銀（亞洲）行政總裁兼首席執行官錢乃驥（SamuelTsien），會喺7月11號正式加盟新加坡嘅華僑銀行（OCBC），做商業銀行環球業務嘅主管，職級係高級執行副總裁，主要湊班新加坡、馬來西亞同埋海外客戶；建銀亞洲主席范一飛就高度讚揚錢氏喺在任時嘅表現同貢獻，但尊重佢嘅意願，睇嚟兩人賓主關係幾好咁喎！
咁啱華華噚日食晏去開銀行家會所，見到建銀亞洲嘅執行副總裁馬志文，梗係打蛇隨棍上，問吓邊個會坐錢氏個位啦，佢賣關子話好快會知，果然下晝建銀亞洲就宣佈，馬志文會代替錢氏坐正，消息嚟得真係「好快」。
[email protected]