當兩個人一同生活，但彼此的隔膜卻變得比水泥鋼筋牆還要厚的時候，也許是緣份到了盡頭，花再大的力氣去打破它也是徒然，倒不如，讓愛情死去。
快將42歲的陳慧嫻，終於親自為她與醫生男友謝國麟的五年情畫上句號。
今天她說得淡淡然，但誰會比她更心傷？
全世界都認為謝國麟不忠，惟獨慧嫻信任他，不但包容，而且遷就，學刨哲學書、忍受對方抽煙喝酒，嘗試投入對方的世界；只可惜大家的距離，依然「這麼近，那麼遠」。五年情，最後總結只得這六個字，太無奈了。
撰文：朱倬誼 攝影：林德雄
化妝：MarshaMaofA&Vmakeupschool
髮型：RitzLamofHairCulture
心已穿 全是你的箭
人世間緣起緣滅，陳慧嫻終於選擇了和醫生男友謝國麟結束五年情，她當然深受情傷，幸而情況未至太壞，對感情事仍有話直講，只是時而嘆氣，時而眼眶微紅，當中包含了太多無奈。
前日慧嫻在西貢接受本報專訪，揚言跟謝國麟分手是因為性格不合，她平靜地說：「大家唔係冇遷就，但性格唔係咁啱，遷就得耐會攰，有時想放棄，不如分開啦。我哋喺性格、作息、嗜好同處事都好唔同，一齊夾硬咗少少，慢慢覺得唔夾、疲累，這麼近、那麼遠，好無奈。或者畀啲時間同空間大家，我都希望有適合佢嘅人出現，佢開心，我就會開心。」
傾偈明日復明日
雖然慧嫻和謝國麟都努力挽救過，可是當兩個人同一屋簷下，卻相對無言時，真的神仙難救。「我唔係佢所要求嘅每朝陪佢食早餐、跟住同佢食晏傾偈嘅女仔，大家興趣好唔同，見面時間又唔多，佢返工係朝9晚8，放工只係食飯時候傾幾句，跟住佢已經好攰，食完飯轉頭見佢已經喺梳化上瞌着咗，時間耐咗，大家就越來越生疏。」
「佢返屋企時，我日日都係同佢講嗰幾句，『今日生意點呀？』、『有幾多個病人呀？』、『今日賺咗幾多錢呀？』多數係我問佢，佢唔問我㗎，我諗佢唔係太知我心底需要乜，我有同佢講過，但第二日佢已經唔記得，因為太攰，話『聽日至講啦』，噚晚你又話聽日講，聽日又話聽日至講，咁冇得講㗎啦喎。其實，我需要佢照顧我多啲，明白我多啲，體恤我多啲，錫我多啲，愛我多啲……」說時，她有點黯然。
對伴侶底線日降
慧嫻對愛情很專一，與她拍過拖的只得音樂人區丁玉、美術及形象設計師張卓文（MichaelCheung）和謝國麟。前者十分溺愛她，張卓文則令她變成愛情路上的小女人。
「我做嘢時係大女人，但鬼叫你鍾意一個人咩，我好欣賞MichaelCheung嘅才華，咁就做咗小女人啦，但係，『吓？乜你食煙㗎？』我唔鍾意人食煙，以前區丁玉畀我治，係寵愛我，佢唔食煙又唔飲酒，鍾意大自然，識整電器水喉，花名技工；MichaelCheung係藝術家，佢做廣告公司，有邊個唔食煙？我又接受咗。由嗰時開始，可能我對男朋友嘅底線已經降低咗，可以忍受到佢嘅壞習慣，變咗有時太遷就人，大家心目中好惡、好鬼霸道嘅陳慧嫻，其實老早已經冇咗。」
「以前個男朋友……我揸車同埋媽咪一齊去到佢公司樓下，等佢做完嘢食飯，佢上車問『去邊度食呀？』唔係你諗㗎咩？因為多數我就佢，佢想食乜嘢咪食乜嘢囉。嗰時覺得幾委屈，特登喺屋企出嚟同你食晚飯，仲要嗌埋媽咪，去到你公司樓下同你食晚飯，點鬼知你上到車，仲要黑起面話我好唔諗定食乜嘢……」
原來世間愛情 三分總是欺騙
與謝國麟拍拖，慧嫻又是遷就，但他們性情兩極，要融合真的難度高。慧嫻說：「到我識咗醫生，佢又係食煙、飲酒，或者佢喺性格上唔係我認為最好，或者以前我未必鍾意咁樣性格嘅人，唔知係咪慣咗遷就我愛嘅人，掉番轉頭係我縱佢，好多嘢由佢話，我去配合，去到某一個地步，我真係配合唔到，醫生唔係太了解我，對我要求好高，我又達唔到要求，覺得自己好冇用，佢想要嘅係熟讀《資治通鑑》，或者對哲學好有認識、好有興趣嘅女仔。」
「哲學唔太適合我」
「好似我睇《蘇菲的世界》（編按：哲學懸疑小說），去到中間已經唔明，我有嘗試去睇哲學書，但睇咗幾頁好悶，唔係太適合我，佢啲朋友都係哲學教授，講嘅嘢我都唔明，佢哋用哲學嘅言語去溝通，我就好似個儍嘅坐咗喺度。」
大家都以為慧嫻和謝國麟掟煲，導火線是謝醫生去年跟診所護士開房，當全世界都不相信謝國麟的時候，慧嫻卻投他信任一票，她說：「因為整件事佢都好大嫌疑，對佢好不利，我爹哋都係咁講，『環境證供都齊啦，爭在記者未喺房門口錄埋音啫！』但我清楚佢為人，睇落都係姑娘做主動，姑娘越坐越埋，可能姑娘飲咗酒，又寂寞咗啲，當時醫生又係飲咗酒，心情唔係幾好，佢驚姑娘一個女仔坐車返屯門遇到好似林過雲嘅司機，所以意識上開間房畀佢，以佢不嬲嘅行為同飲酒狀況，我信佢。」
拖拉不如再唱歌
往後慧嫻會否與謝國麟復合，她說這是問號，如今只會寄情工作：「我喺感情上比較疲倦，𠵱家工作見到曙光，情願將力量擺喺唱歌上，希望大家唔好誤會我因為感情咁樣至出番嚟唱歌，以前我同佢都講過好多次分手，但大家又唔捨得，於是拖拖拉拉，但我覺得要忍心分開。寂寞係會有，會覺得冇咗個人喺身邊，但需要迫自己咁做，大家企遠啲睇番轉頭，係咪真係咁需要對方？定係習慣咗對方？我唔敢講大家第日會唔會再走番埋一齊，真係要睇緣份，天自有安排。」
眼前的慧嫻決定收拾心情，今年再戰樂壇，近日她簽約鄭家純旗下的國際娛樂，出碟、開演唱會。上次慧嫻出碟遇滑鐵盧，令她意興闌珊，這次她卻看開了：「我冇乜輸唔起咯，豁出去，好豁達，再出番嚟會盡量做一啲以前未試過嘅表演，會盡量做好，我新公司嘅成班同事都好後生、有衝勁、熱誠、有heart，我都唔想令呢班後生嘅失望。」
有情歲月：入行廿年三段情
現年41歲的陳慧嫻，85年出道時認識著名唱片監製區丁玉，其後成為情侶，90年慧嫻赴美國攻讀心理學，翌年主動向區丁玉提出分手。慧嫻94年完成大學課程後重返樂壇，與形象顧問張卓文拍拖，可惜二人於02年因性格不合分手。其後戀上西醫謝國麟，03年更在演唱會上發表愛的宣言，可惜男方去年9月被雜誌拍到和護士到酒店蒲吧親熱兼開房，至近日慧嫻終於與謝國麟分手。
