叫得做中菜大廚，通常都有番咁上下年紀。眼前36歲的周祖堯（Max）熟口熟面又年輕，原來他曾經喺《美女廚房》同周中師傅拍住上，他是MaxConcepts怡翠軒的主任廚師。今次搵佢教大家煮幾味，每道菜外表精緻，做法簡單，想喺屋企做大廚都不是難事呢！
記者：林佩婷 攝影：譚盈傑
16歲已入行的Max，煮餸煮足20年：「我每次煮餸都絕不怠慢，因為當中學到材料特性及時間的掌握，呢啲經驗就是廚師最寶貴的本錢！」
嶺南妃子笑
份量：2人 0hr25min
唐玄宗為𠱁楊貴妃開心叫人送荔枝給她享用，她吃後笑得開心，故將荔枝叫做妃子笑。以為這道菜只是荔枝炒蝦仁，但Max覺得普通，所以將蝦仁釀入荔枝，賣相更靚。
材料
河蝦仁6粒、荔枝6粒（去殼去核）、發邊豆3両（切段）、鹽/糖/水/油適量
芡汁：荔枝2粒（壓成茸）、清湯1/3碗、鹽少許
做法
發邊豆加鹽、糖及水略烚，起油鑊清炒後排上碟。將河蝦仁釀入荔枝，灑鹽後以大火蒸3分鐘後放上發邊豆，最後煮滾芡汁淋上面便成。
貼士
蒸荔枝時注意勿太耐，最多3分鐘，否則蝦肉易霉。
初入行洗毛巾
看Max外表年輕，原來已有20年入廚經驗，「當年讀書成績唔好，老師同我講最好學番門手藝，剛好老竇提議我去學廚，於是咁就入行。」常聽人說學廚好受氣，師傅好惡，當時佢頂唔頂得住呢？他說：「當時被人打同鬧係家常便飯。最記得嗰陣冇洗衣機，師傅用完的毛巾要逐條用手洗，放工後先偷偷練習煮餸。最好彩係學咗4個月就有機會揸鑊鏟煮北菇伊麵，當時煮出來師傅都讚唔錯，於是我嗰陣定咗目標，2年內要做到師兄，5年後要做到師傅，最終都做到。」
整豉油雞最拿手
問到入廚咁耐，最滿意自己煮那個菜，他就指是豉油雞：「自己讚好無用，最緊要係人哋都讚。我曾煮豉油雞給同事食，大家都讚好味。我覺得學廚最緊要畀心機去做，唔好怕蝕底，心目中永遠要有個指標先得。」
鴨吞牛
份量：2人 4hr30min
這道菜曾得過05年美食之最大獎中的至高榮譽金獎，他說：「將牛肉釀入鴨梨內，形態好似個梨吞咗牛肉咁，所以改呢個名。而梨同牛都煮得耐，但肉質夠腍。一個完美的鴨吞牛，就是煮好拿起，裏面的牛肉也不會掉出來。」
材料
牛肋骨肉3両（切粒）、鴨梨1個（去皮去核後從底部用鐵匙羮挖空）、牛筋8錢（切粒）、蘆笋及甘笋各1條（伴碟）、鹽少許
醃料：子薑3錢、薑及葱各2條、冰糖適量
做法
牛肋骨肉及牛筋加醃料，與梨用中火燜4小時後隔汁備用。梨待涼後從底部挖空中心，釀入牛肋骨肉及牛筋，在梨上輕灑鹽，用大火蒸20分鐘上碟。將燜牛肋骨隔去的汁煮滾後再淋上梨，洗淨的蘆笋及甘笋伴碟便成。
貼士
由於牛筋膠質重，要煮耐一點才會腍。可先燜1小時後再放牛肋骨肉，這樣牛筋會更腍。鴨梨挖空時記得不要挖得太薄，否則蒸時容易爆開。
花旗參燉雞湯
份量：1人 3hr00min
Max話花旗參清熱、丹參恒氣滋潤，運動不足常氣喘的男士飲了可強身健體，女士一星期飲兩次，對紓緩經期不適也很有幫助，所以他常煲給太太享用。
材料
丹參1片、花旗參11/2粒、豬𦟌2両（切粒汆水）、烏雞3両（切件汆水）、鹽少許、水1碗
做法
丹參及花旗參浸水3分鐘，與豬𦟌、烏雞加水燉3小時後落鹽調味。
貼士
豬𦟌、烏雞汆水要徹底，否則燉時滲出血水，令湯起黑點。
杞子翡翠浸海斑
份量：2-3人 0hr50min
普通的海斑多數用來蒸，Max今次特地教大家用湯煮，因為他覺得這樣做魚肉食落時會更滑。
材料
青斑1條（約1斤重）、杞子12粒、翡翠苗1包、鹽/生粉/糖/油各少許、水10碗
湯料：鯊魚骨2両、魚滑8両、水8湯碗、薑葱少許、白胡椒粒6粒
做法
青斑兩邊起肉切件，用生粉及鹽略醃後拉油拖水，魚骨用大火蒸5分鐘。翡翠苗用10碗水/鹽/糖/油烚熟隔水再炒放上碟，再放上魚骨。將湯料/杞子/魚肉煮滾後上碟便成。
貼士
魚肉拉油後無咁易散開，容易夾起。
起魚肉有妙法
先用刀沿魚身邊位𠝹開，再由魚尾開始起肉，感覺會較順手。
買定料
紀曉華明日教你煮餸
魚「鄉」茄子
細白色或紫色茄子3隻、蝦亁3.5g、蒜頭10粒
同根生
豆漿1杯、魚湯1杯、大豆芽菜200g、豆腐250g
麻油牛肉
西冷扒1塊、金菇2包
黑米涼粉
涼粉600克、紅椒1個、沙葛300g