Car通：網傳酒精降溫<br>唔使濕身

Car通：網傳酒精降溫
唔使濕身

夏日炎炎，愛驅熱咗成日，放工攞車一打開門時，嗰陣熱氣簡直好似火場「氣爆」咁堅，若係露天車場就更甚！而且開極冷氣都唔涼，真係想用條大水喉噴完架車噴自己！網上就一直流傳緊一招降溫秘技，利用酒精加水居然可以瞬間降溫10℃！台灣電視台仲做埋實驗，效果驚人。美甜咁怕熱，梗要親身一試！

記者：梁美甜　
攝影：黃子偉、陳偉強
模特兒：Victoria

捽酒精退燒原理

酒精降溫辦法好簡單，只係用一些藥用酒精和水，以1:1比例混合，喺上車前向內櫳噴幾下，氣溫就會降低10℃咁話！原理有點像小時候發燒，阿媽用酒精抹身嘅原理咁，但10℃聽落好誇張，實際如何？去片！

■藥用酒精加水以1:1混合，即成又平又有效嘅降溫劑！

實驗過程

將部車放喺太陽下暴曬一輪，以溫度計一量，嘩！車內溫度高達35℃，唔熱死都焗死！跟手就用預先以1:1開好嘅酒精（可按喜好加減比例）向車櫳噴幾下，之後再拎起溫度計嚟睇，咦？真係降低至27℃，即係10秒內就降咗成8℃，犀利！

■上車時噴幾下，10秒即刻見效！

■暴曬一輪，車內氣溫高達35℃。

■酒精降溫法令溫度10秒內下降8℃。

專家話你知

中大生物及化學系副教授陳竟明解釋降溫原理，「喺酒精揮發過程，酒精分子會帶走熱能，所以出現溫度下降情況。當水加酒精經由噴壺噴出嚟時，會形成好多細小水點，迅速蒸發嘅同時，亦代表酒精揮發，過程中會耗用車內大量熱能，我哋部車就喺『失熱』嘅情況之下得以降溫喇！」

中大教授：有潛在危險

「酒精始終係易燃物品，若加上燃點物好似火機或壓縮氣罐等，好易會發生危險！」陳教授話都係用番自然方法最好，一上車開晒窗，以對流原理利用自然風帶走車內嘅死風，通風後先開冷氣，咁就又慳又安全，仲好環保㖭！

護理專家：酒精損壞皮椅

汽車護理公司市務經理PatLeung：「好多汽車都採用真皮或人造皮，一般都有唔同花紋及顏色，但全是後天壓製而成，「以酒精噴灑車櫳，好易傷害到皮色同花紋，得不償失！」

清爽除臭有計

除咗降溫，夏天另一大問題當然係除臭，炎炎夏日，好多嘢容易發出異味，若親朋好友特別大汗，上到車焗住仲難頂！所以部車不時都要放啲清新除臭物品，大家都舒服啲嘛！

除臭產品好介紹

市面上有好多除臭產品，好似殺菌除臭嘅香精噴霧咁，效力一般可以維持一至三個月嘅時間；又或者近年大Hit嘅備長炭產品，一般都話有除臭殺菌嘅功效。好似加有炭嘅冷氣隔塵網、地台除臭膏咁，而且都可以連續用上好幾個月，安然度過炎夏！

■上層消臭下層飄香二合一，4個月有效。$55（a）

■一晚用消臭劑。$48（a）

■放於椅底嘅除臭殺菌座，4個月有效。$55（a）

■樽裝「消臭極炭」，3個月有效。$48（a）

■座椅殺菌除臭劑，分有味同無味兩款。無味$52（a）（左）有味$48（a）（右）

車上勁爽新產品

唔係部部車都有個雪櫃咁High，想喺夏天Keep住有凍嘢飲，呢款「一罐雪櫃」就啱晒你！可以喺短時間由熱變冷，可惜只限一罐飲品嘅容量，聽講林曉峰都入咗四個，一家大細都有得嘆！
另一個最得我歡心嘅，就係搞鬼太陽能散熱機。裝喺窗邊，只要有太陽，部機就自動運作，就算泊低部車唔着副偈，單靠太陽一樣可以隨風送爽，上番車都無咁熱。