陳冠希（Edison）進軍潮人時裝界，短短幾年，搞得有聲有色，自家品牌CLOT仲剛剛度過咗3周年，可喜可賀。佢呢份雄心壯志，仲得到周星馳睇起，邀請佢同旗下商場gi合作大玩Crossover「giMall搾乜汁×JuiceStand搞檸掂」，星爺出手惡搞潮流界，仲連果汁都撈埋！
記者：葉雪芯
攝影：陳陶鈞
以為佢講笑
今次的Crossover「gimall搾乜汁×JuiceStand搞檸掂」，Edison的品牌CLOT會為星爺旗下的商場gi推出CLOTDragon限量版快餐店職員Tee及速遞員概念WorkerShirt，而gi就會首次為CLOT製作「gi搾乜汁」（紅莓番石榴果味），配合番Edison的舖名「Juice」。講到呢個Crossover係點樣開始，一切都由開拍《跳出去》時開始。Edison：「星爺知道我有搞時裝，有一日搵我傾，想一齊搞啲潮流嘢。初時我以為佢講笑，後來佢好認真咁拉住我去傾點設計啲衫，一齊傾出啲乜嘢好，又叫我去gi度開舖。喺商場開舖暫時未開到，後來就研究不如搞個Booth，即係𠵱家呢個JuiceStand，因此促成咗今次合作。」
搞檸掂唔覺係粗口
CLOTDragon限量版合共兩款，每款限售100件，7月7日（六）正式登場。快餐店職員概念Tee於胸前印有CLOTLogo及快餐店字樣，而後方則印有CLOTDragonLogo圖案，加上「三分鐘搞檸掂」Slogan，而速遞員以短恤衫為藍本，加上CLOTExpress及CLOTDragon的圖案及繡章，極富Worker味道。服裝的設計意念，幾乎係由星爺做龍頭作引導：「成個Concept其實好輕鬆，星爺一開始就畀咗個Idea、大方向，就係想玩本地特色，佢問我如果要令人諗起香港，我會諗起乜，第一個印象我就諗起茶餐廳，我拍戲食外賣食得最多，仲有香港人乜都要快，乜都唔超過三分鐘，『搞檸掂』係我嘅口頭禪，人哋話我講粗口，我唔覺喎！《搾乜汁》係星爺諗嘅，佢話搾果汁襯番我舖名，我問佢搾乜汁，佢答我『咪就係搾乜汁囉！』，買衫連果汁，幾得意呀！」
初見星爺有啲驚
除了限量版外，仲推出每款2件咁大把嘅經典版（即全數得4件），gi會員須於場內消費，首兩位最高積分會員，即有機會獲得。而經典版速遞員短恤衫上會加印周星馳嘅金句「衫並唔係咁着」，而經典版快餐店職員概念Tee則會加印「我同你講咩都嘥氣！」Edison：「呢句其實係我首歌《嘥氣》嘅歌詞，亦係我金句，我經常同記者講，非常代表我嘅態度，而且咁多人聽過，都算經典啦！」
首次同星爺合作，Edison受寵若驚：「我好鍾意周星馳，由《430穿梭機》捧場到《功夫》，好欣賞佢覺得佢好有料。佢搵我拍戲已經好開心，後來仲主動話一齊搞合作，最初真係有啲驚，因為不嬲知佢做嘢好認真，接觸後就唔驚喇！佢好Nice，無架子，仲好支持後輩。睇得出佢好有心搞潮流嘢，特登投資商場，今次合作嘅過程中佢又畀咗好多Idea，好有魄力。」
查詢：gi（31885273）
尖沙嘴加連威老道32-34號
陳冠希點識星爺？
「紅娘」咪就係星爺套大製作《跳出去》囉。電影由馮德倫執導，周星馳監製，陳冠希擔任男主角。雖然焦點落在「星女郎」張雨綺身上，但由於戲中有大量的HipHop舞蹈，合晒Edison「何車」。編劇和大綱係由星爺一手策劃，故事講女主角白天是清潔女工，到了晚上卻又換成了另一種身份，苦心跟男主角學HipHop舞的成名故事。據知《跳出去》嘅海外播映權及全球發行權已經俾哥倫比亞公司收入囊中，全世界華人都等住睇！
