今年7.1係特區回歸10周年，呢日亦係爭取自由、普選嘅大日子；而英超65名球員當日亦成為自由身，可以自由轉會決定自己命運。其中好多球員名氣同實力兼備，啱啱入主伯明翰嘅本港商人楊嘉誠，不妨考慮執番幾件喎！
香港人出名識走位，唔係點會有咁多忽然愛國人士呢？講到買嘢嘞喎，梗係要平靚正喇！上述65名自由身球員入邊，名氣最大有利物浦嘅辛頓、科拿，查爾頓嘅哈索賓基、韋斯咸嘅舒寧咸；至於國腳級，車路士嘅華朗仲打緊美洲國家盃，利物浦門將杜廸克亦曾代表波蘭！
平靚正任你揀
年齡方面亦係有老有嫩，啱晒唔同球會嘅需要；最年輕係19歲曼聯後備組小將丹尼爾羅斯，最老就係41歲嘅舒寧咸；至於國籍方面，從英倫三島到捷克人施歷錫、冰島人傑斯拿臣、意大利人比士東、摩洛哥人艾卡高尼等；所以真係唔怕楊生搵唔到，至怕係溝通唔到啫！
我求大俠係忠實意大利波球迷，對於呢支英超升班馬伯明翰冇咩感覺，不過念在老細楊生係香港仔份上，𠵱家就醒個必買之選穿雲箭過佢哋：杜廸克串後衞奇治摩亞，再串翼鋒辛頓、射手哈索賓基，領隊布魯士仲唔拿拿臨去超市照單執貨？
上述4件，加埋原有嘅射手麥舒菲爾、謝路美同新加盟嘅卡普等主力，伯明翰呢個陣容有前有後，絕對係中型班班底，咁樣佢哋今季響英超就一定掂硬喇！