噚日係香港回歸十周年嘅日子，亦係側田31歲生日，前晚佢就叫齊班朋友去中環halo酒吧慶祝，同公司嘅吳雨霏（Kary）、傅穎、楊愛瑾（Miki），以及經理人黃柏高都到齊，崔建邦、房祖名都有到賀，連側田緋聞女友林苑都着晒低胸裝嚟賀壽，不過林苑坐的士到場時，一見有記者，即刻表現愕然，問佢係咪去側田生日會，佢就好驚咁話：「唔係唔係，我約咗朋友之嘛。」
林苑行到酒吧門口都唔敢入，卒之擾攘咗五分鐘之後，有個男人喺酒吧裏面出嚟接咗佢入去。玩到噚日凌晨三點左右，林苑同成班人一齊喺正門出嚟，然後借人群遮擋下快速閃走，同一時間，側田就喺後門走人。
紅館個唱當賀禮
據聞前晚側田成班人都玩得好盡興，Kary話冇送禮，Miki就送咗件tee畀壽星仔，黃柏高微醉出現時，被問到送乜賀禮畀佢最錫嘅側田時，佢話：「紅館演唱會囉。」不過佢玩完離開時，就已醉到講嘢只得口型冇聲出，十分搞笑。
此外，Kary噚日喺大埔舉行新碟簽唱會，即場勁歌熱舞，又同歌迷玩遊戲，以露臍裝示人嘅Kary話：「原本件衫後面有好大個V，不過知道要跳舞，所以就換過另一件。」
