03年有桑尼安達臣、04年嘅多拉素，05年輪到艾辛，上年則係廸亞拉，聯賽6連霸嘅里昂幾乎年年都與部份主力「好心分手」；嚟到今年仲激，堤亞高文廸斯同艾比度相繼逃離此法甲王者後，法國國腳翼鋒馬隆達就表露心迹：「我個心去咗車仔喇！」
馬隆達上「車」在即
油王阿巴莫域治閂實水喉，車路士不再揮金如土，夏天只係免費執咗幾件名氣平平嘅球員返嚟（阿歷士洛里高只需象徵式50便士），領隊摩連奴買人亦顯得極為謹慎，但佢睇中嘅法國左翼馬隆達，就可能要佢哋付出今夏第一筆轉會費。
正值當打之年，27歲嘅馬隆達坦言心繫車仔，里昂就算留到個人，都留唔到個心，佢話：「查實我決定咗下一個落腳地，就係車仔；唔應講嗰句都講埋，我同摩連奴傾過，而里昂高層亦知我去意已決；雖然艾比度過咗巴塞，但影響唔到我。」外界猜測，交易應喺數日內完成，轉會費為1,200萬鎊（約1.9億港元），屆時洛賓嘅位置將進一步受到考驗（祖高爾畢竟係摩帥愛將）。
法甲球員當里昂係王宮，但一旦入宮，唔少野心之輩都覺得係「監獄」，事關無敵是最寂寞！馬隆達走頭傳聞甚囂塵上，我求大俠諗唔明里昂可以逐年放走主力，最終又可無驚無險地喺聯賽由頭帶到尾？
今夏，中場堤亞高文廸斯去咗祖雲達斯，左閘艾比度過檔巴塞隆拿，里昂已賺咗逾3億港元，加埋賣馬隆達筆錢嘅話，佢哋幾乎可以收購晒國內嘅精銳部隊，繼續霸業；然而，歐洲行家同我求大俠講，里昂呢期好似唔多想擴軍，希望實實際際搵真銀算數，加埋可能係近年最冇號召力嘅教練佩連，代替侯利亞掌舵，我求大俠有啲戥佢哋擔憂㖭。