上個禮拜，有個六十幾歲嘅女股民，懷疑炒燶孖展跳樓自殺，引起一眾網友感嘆，認為冇必要咁就輕生，網友黃錦文更話：「期指、窩輪都係啲害人工具，應該要立法取締。」
賭埋條命何苦呢
Kolau慨嘆：「炒股賭埋條命，何苦呢！」Jansons亦指：「貪字得個貧，凡事唔好去到咁盡，唔係嘅話連條命都冇埋。」CCQ28話：「高風險、高回報，但同樣要預咗容易死。」Blowwatermanlau認為：「佢係大戶屠刀之下嘅犧牲品。」
網友基浩小學生就話：「孖展真係掂唔過，唔好玩呀！」Tke666好同意：「退咗休就唔好玩孖展啦，咁危險！」Johntt亦和議：「以事論事，如果唔係借孖展去炒，退休反而有大把時間研究，炒得仲輕鬆，邊度會搞成咁！」
FVV就建議：「要預咗破產先至好炒股，就好似賭仔去得賭，個個都預咗會輸晒。」Raykan相信：「咁就證明做好風險管理幾咁重要。」leukemia亦指：「股票呢家嘢，玩吓好喇，千祈唔好瞓身。」
http://www11.discuss.com.hk