時間：01年8月
地點：香港
人物：陳啓泰
經過：甩頭髮係天下男人嘅大忌，到𠵱家都好似冇乜嘢方法可以完全根治，不過坊間就流傳好多古方，可信程度有待商榷。陳啓泰早年就傳出有脫髮危機，佢好緊張咁四圍尋求方法治療，01年佢就俾雜誌踢爆靠飲尿防脫髮，每日都會飲番自己嘅尿液，原來佢已經飲咗尿成三年。講真將自己嘅尿飲番落肚，都要好有勇氣先得。
對於自己呢個大秘密俾人公開，陳啓泰當年發晒𤷪𤺧，非常之介意，佢猛咁解釋話自己根本冇脫髮問題，仲話自己飲尿係因為家族有遺傳癌病，同脫髮無關喎，陳啓泰當年話：「我阿爸同阿哥都患有腸癌，我睇過好多養生嘅書籍，從中找尋到呢個健康法門。」
陳啓泰雖然飲咗三年尿，不過佢絕對唔贊成大家亂咁試，佢話：「如果有人信晒，有事嘅話我要負責，呢件事分明擺我上枱，咁樣對我唔好。我唔係醫生，唔想誤導任何人，呢幾年我花咗好多時間鑽研健康之道，係我個人嘅心得，呢樣嘢對我有幫助，唔表示人人可以接受。因為有人試過飲尿之後病情加重咗，當然也有人有幫助，我要做個負責任嘅人，唔可以咁隨便叫人飲呢樣嘢。」
【本欄逢周一至周六刊出】