港交所慶祝七周年，六月二十一日在萬豪酒店舉行慶祝酒會。左丁山一入到場就碰到公關Y，佢話近幾個月好難「卜」地方辦酒會或記者招待會，金鐘灣仔中環嘅五星級酒店、會展中心，全部一房（functionroom）難求，令到啲公關鬼咁緊張兼頭痛。年底中環麗嘉又話拆卸重建寫字樓，酒店買少見少。本來中區文華東方地點最正，但限於舊式設計，一個長而窄嘅宴會廳，幾難用；最新嘅四季酒店嘅宴會廳亦不如理想，故此金鐘三間酒店與君悅嘅生意唔憂做，起價都冇佢哋符。
港交所董事會由夏佳理主席率領，列隊歡迎來賓。人哋話周文耀總裁腳頭好，一上任，股市就反彈，夏佳理主席腳頭都好好啫，去年上任後，每日成交額升完又升，曾突破一千億元；港交所股價一樣升完又升，成為紅底股。夏周兩人曾在新鴻基證券合作過，𠵱家再拍檔，威盡一時，馮景禧泉下有知，當撚鬚微笑。
賓架W與左丁山打招呼，連忙恭喜佢為家族慈善基金捐出一億七千萬元畀中文大學成立新書院，畀證券A女士聽見，開玩笑咁話：「W先生點解唔捐錢畀港大啫？」港大啲校友喺政府打工，威過威士忌，在商界亦不忘為母校爭取捐款，相比之下，中大人啲「鬥心」似乎差咗一皮半皮。不過捐款講淵源，賓架W先父曾經捐過錢畀中大，賓架W弟弟在崇基畢業，佢自己在崇基讀過一年。賓架W話：「𠵱家啲中大生有冷氣宿舍住，夠嘆吖。我讀崇基之時，宿舍多蚊到唔恨，風扇都難搵到一把，夜晚熱到瞓唔着，更要與飛蚊作戰！」幾十年前嘅環境確係唔同嘅，賓架W與同學行出馬料水沙灘，可以隨手捉魚蝦蟹帶子嚟食呢，𠵱家連沙灘都冇埋咯。
見到大基金經理K，梗係問吓炒股環境，基金K連忙耍手：「升到我都唔識睇，總之一齊癲，唔捨得出貨住！」市旺就有大把生意做。證券D揸住杯白酒話：「我哋搵日本公司嘅中國業務上市，幾乎做唔停手。」咦，有新意噃，台資將中國業務上市（如富士康，裕元），成為藍籌股㖭，日資亦有中國工廠，照辦煮碗啫。不過證券D話：「我哋識日文㗎，人哋未必咁易做！」