無綫劇集《學警出更》每次宣傳，主角陶大宇和郭羨妮（Sonija）都沒出席，昨日該劇在荷里活廣場搞大型活動，有播出20集才第一次現身宣傳的陶大宇，但與他傳緋聞的郭羨妮則仍缺席。大宇第一次宣傳，高呼事過境遷，報道要適可而止，多番強調不要搞到要人死，又維護郭羨妮，足證大宇甚體貼羨妮。
無綫劇集《學警出更》每次宣傳都不齊人，有傳因怕陶大宇和郭羨妮的緋聞，影響《學警》的形象，所以不想他們一起宣傳，搶了其他人的風頭。有無綫經理人合約在身的郭羨妮，劇集宣傳期返加拿大休息，自由身的陶大宇則等待事情變淡才現身宣傳，昨日他首次出席《學警》宣傳活動，成為追訪的對象。
突氣憤謂不公平
在劇中飾演張Sir的陶大宇，昨日收起往日嚴肅的態度，心情輕鬆地接受訪問，更否認迴避緋聞不肯宣傳，他說：「我唔係特登唔做，大家都有眼睇，我之前去日本拍外景，返嚟又去咗內地做嘢，真係唔喺香港先至做唔到啫！」劇集收視不理想，有說是因為陶大宇和郭羨妮的緋聞令人反感，他說：「唔關事囉，其實收視我覺得係穩步上揚緊，係人都想最好有100點㗎喇！」
大宇指有關報道對他不太公平，更突然氣憤難平的說：「少少唔公平，都預咗會俾人寫唔好嘅嘢，但我就覺得大家要適可而止囉。寫又寫過、踩又踩過、話又話過啦，係咪要迫死人，要死至安樂啫？唔該大家筆下留人喇！」
「我哋又唔係犯法」
大宇表示沒跟郭羨妮聯絡，不過他仍然維護郭羨妮說：「咁寫個個都死喇，對Sonija又唔好，咁寫佢係傷害性嘅稱呼（狐妮），對我前妻、對我、對邊個都唔好囉。我都明白大家係搵食，但我哋又唔係犯法，就算犯法坐完監都冇事喇，更何況我哋都唔係。」
此外，陳鍵鋒和徐子珊之後應邀到九龍灣MegaBox尚流地帶宣傳，徐子珊大爆陳鍵鋒注重儀表是個購物狂，陳鍵鋒直認喜歡收藏名貴手錶，最昂貴一隻價值達六位數字。徐子珊還透露近期獲相士指點迷津，淺色會利她事業發展，故買了一架白色新車，對於在電影《跟蹤》演出獲好評，她表示沒想過奪新人獎，怕期望過高。
採訪：楊潔雯、卓寶花 攝影：葉君海
