我叫翹仔，歲半大。今時今日香港地潮字當道，做B都要做到與時並進。尤其家陣商場越來越多嘢玩，最近聽聞有百貨公司首創BB餐廳，呢件簡直係BB界盛事，我收到風已經第一時間拖爹哋媽咪去踩場啦！你仲未去咩？唔緊要，等我帶路話你知邊樣最好玩好食！
記者：劉嘉蕙 攝影：譚盈傑
BB餐營養均衡
講到明係BB餐廳，首要試嘅梗係食物啦！呢度嘅BB餐同日本嬰兒食品品牌和光堂合作，根據BB成長四個階段提供共10款套餐，每個餐有齊基本營養元素。餐廳負責人話：「BB成長至5個月後，就可以開始消化澱粉質食物，可以畀佢哋進食離乳食品，鍛煉BB咀嚼及吞嚥能力，早日刺激味蕾，大個後會冇咁易偏食。」我仲搵咗註冊營養師黃榮俊睇過餐單，研究各個套餐係咪合乎營養指標。
食神試味
學吞期：5至6個月
野菜餐$15
食乜嘢：菠菜小松菜、米粥、生果糊仔
營養度：豐富澱粉質、維他命A、C及纖維，但缺乏足夠蛋白質。
好味度：翹仔試菠菜糊仔，未擺入口，一見即喊。記者試過，個菠菜茸其實冇乜味道。
學啖期:7至8個月
魚粥餐$15
食乜嘢：溫野菜沙律、白飯魚粥、生果糊仔
營養度：整體營養均衡
好味度：雪盈好鍾意個橙味糊仔，食到停唔到口。
學嚼期:9至11個月
和風餐$29
食乜嘢：白身魚及蔬菜、軟飯、蘋果糊仔
營養度：整體營養均衡
好味度：記者覺得好味，白身魚味道似麵豉煮魚，一路最鍾意食蘋果糊仔。
學吃期：12個月以上
漢堡扒餐$25
食乜嘢：漢堡扒、軟飯、布甸
營養度:整體均衡，可加少 少蔬菜糊仔。
好味度：翹仔表情好詭異，究竟好唔好味呢？記者覺得味道OK，唔難入口。
大人食BB餐
餐廳入面暫時冇大人餐供應，爸爸媽媽餵BB時見肚餓，可以考慮叫小食餐及有機雜菜甘笋汁，又或者去自動販賣機買BB餅仔食，味道唔錯，都算食得過。
營養師建議：BB食品不可太硬
註冊營養師王俊榮話：「BB喺六個月大就可以食半流質固體食物，減少餵奶次數，平均3至5日可以添加一種新食物。太硬、太鹹或煮得太耐嘅食物都唔適合BB。」佢推介適合歲半以下BB的食物。
葉酸：將深綠色蔬菜做成糊仔或切碎。
澱粉質及脂肪：米糊、粥、薯茸、牛奶及蛋黃都適合。
鈣及磷：牛奶、蛋、深綠色蔬菜、豆腐、豆漿、莧菜。
鐵質：將蛋黃及豬牛肉切成碎、絲或粒狀，幫助BB咀嚼及消化。
鋅：魚肉及蝦仔可增強免疫力。
維他命A：紅蘿蔔、南瓜、番茄、菠菜。
維他命D：肝臟、蛋黃。
維他命C：西瓜、番茄、橙及奇異果榨汁。
潮B試新餐廳實錄
第1站：BB車停車場
BB都可以泊BB車！餐廳門外有個BB車停車場，泊好架車先去食飯，入到餐廳就有更多空間走動，最緊要唔使額外收費，任泊唔嬲，不過只得兩個位，先到先泊。
第2站：哺乳區
出街食人奶好唔方便，所以一嚟到梗係要睇吓哺乳區嘅形勢。餐廳有兩間哺乳房，全部上鎖，要搵職員開門，私隱度十足。入到去，紅色座椅夠舒服，成大部空氣清新機輸送清新空氣，另有暖奶器提供，諗得真係周到，值得掌聲鼓勵！
第3站：清潔換片區
換片區提供6張軟墊換片床，有尿片及濕紙巾俾爸爸媽媽應急，場內亦有齊水、皂液等基本衞生設備。換片床三面有圍牆，夠闊落又安全。以我翹仔瞓過咁多張換片床，呢張都算相當唔錯！
第4站：用餐區
用餐區有4個BB座位，全部加晒軟墊，坐得舒服又穩陣，食都食得舒服啲。
BB餐廳及BB護理室（26941111）
地址：沙田新城市廣場第3期2樓西田百貨
營業時間：11am-4pm