公關大姐大請食午飯，神神秘秘，話要去一間包保左丁山未去過嘅餐廳，喺FCC隔籬，左丁山去FCC唔知幾多次，冇留意到隔籬寫字樓有間餐廳喎。行斜路上去，一望，呢間IceHouse原來就係當年左丁山做私募基金（privateequity，𠵱家呢行紅到發紫，可惜左丁山出世早二十年，嗰陣時做privateequity，冇人知你做乜。）之時嘅寫字樓，以前叫做EdkoTower，係EdwardKong嘅縮寫，即係安樂電影嘅老闆。
呢間大廈不單改咗名，用途都改埋，唔做寫字樓，改為服務性住宅（鄧文正最憎個「性」字！）生意幾唔錯，以歐洲遊客為主，大廈地下開咗一間新派混合菜式餐廳，賣fusionfood，中菜西吃，例如點心之中，冇蝦餃燒賣，而係臘腸雪糕，鴨肝手卷，麵豉鱈魚配日本清酒啫喱；主菜就有老虎蝦羊架、四川汁燒豬、和牛河粉等等，十分趣致，價錢唔貴，未試過嘅可以試吓。大姐大話抵食，知左丁山未試過，特登在此請客。可惜吖，午餐時份，即使酒價五折，午餐收一百八十至三百八十，仍然只得五成上座率（其實望落去呢間餐廳只有二十幾個座位），晚餐時份就唔知咯，如果唔大食，可以約男女朋友嚟一試。分量方面，啱晒鍾意食得少嘅女士，大食精如左丁山食完大姐大呢餐，到咗四點零就要秘書打電話去「翠華」叫外賣，以奶油豬仔包加魚蛋河頂肚。
餐廳喼頓話菜式（Menu）個個月唔同，七月份又有新創意，叫我哋再嚟。香港有唔少有創意嘅廚師將中日料理加法國、地中海餐熔於一爐，做出嚟嘅菜式，presentation十分考究，係本地粵廚唔會花心機做嘅，但口味方面，食開陸羽福臨門鏞記嘅，就會覺得差少少。心思方面，居然諗到將臘腸、膶腸燒汁，融入雪糕，加上米通奉客，作為頭盤，真係服咗佢，雪糕食落係鹹嘅與米通一齊咬，幾過癮。呢日好彩食過魚蛋河啫，因為晚上去到九龍灣名店食雞肝魚腸炒蛋，一字骨冬瓜湯等等，全部鹹得緊要，食少少就要放低，返到屋企要立即用苦瓜亁煲水飲！