「揸貨車，男人專利、揸棍波，女人唔掂。」身為美少女的C記（即係我），每次聽到呢句說話嗰陣條氣都唔多順；而且小妹一向扮晒反傳統，再加埋個日本妹老死，話喺日本人人都覺得揸Truck最有型，所以一直堅持小型Truck係自己嘅DreamCar。不過講到揸棍波，就真係唔多夠信心，不過今次對住呢部FordRanger3.0，形勢即時唔同晒，皆因女仔操控一樣「EasyJob！」
記者：黎頌詩
攝影：陳盛臣
模特兒：Catherine
棍波大挑戰
香港地人多車多，揸車幾大都要揸自動波；亦因為咁，揸棍波早就變成咗型爆嘅象徵。呢日，淨係睇樣已經型爆嘅Ranger3.0當前，仲唔把握機會扮吓型？編輯哥哥阿龍加埋C記，爭住要挑戰車行師傅。師傅信哥氣定神閒：「即管放馬過嚟！」嘩，信哥咁有氣勢，C記自己就久疏戰陣……不過，點衰得？一於上！
測試方法
將兩個「小心地滑」告示牌同5樽樽裝飲品連空紙箱放喺貨斗，然後開行100公尺，目的係測試行車時嘅穩定程度，冧得越多嘢，揸手波車嘅技術就梗係越屎啦！
測試實況
師傅信哥：「呢架棍波好易揸！」
首先由信哥起步，唔使問，果然穩定流暢，基本要求啦！不過睇吓佢個得戚樣，仲風騷到不時望鏡頭，擺明就要話你知：「簡直EasyJob！」
編輯龍：「咩呀，係個地唔平咋！」
接住係編輯龍，「我有10年駕駛經驗，無理由屎過師傅嘅。」一樣充滿信心嘅佢，一支箭咁就完成左100公尺賽程，招招積積懶快咁，實情完全唔顧架車會拋跌晒放喺尾斗嘅樽，結果……
記者C記：「女仔都揸得掂！」
最後到C記登場啦！踩住離合器、入波，鬆腳、畀油；哈哈哈，好彩仲記得點揸！再轉波，弊，出事㖭！個離合器有啲重，要大力啲，最後小「蝦碌」，但總算無驚無險，走畢全程！
運貨好嘥料
如果你仲係覺得貨車只係用嚟運貨的話，咁就真在大錯特錯，尤其係見到FordRanger3.0個型樣，就更加肯定淨係用嚟運貨嘅話會好嘥料，因為佢無論實用性定賣相都大有提升。
外觀最搶眼嘅係左右兩邊連車尾都加上腳踏、貨斗裝埋金屬架，運動味大幅爆發、胎軨由15吋變成16吋，全部都啱晒我口味；不過2.5型號有3座位同5座位揀，而3.0型號就只有5座位，當然貨斗會都會短啲。咁都合理嘅，因為3.0型號更強調多用途，更適合約埋三五知己上山下海玩餐飽嘛！
真皮波棍好手感
新車內櫳鋪排亦細緻咗唔少，師傅信哥就大讚包咗真皮嘅波棍，話佢好睇之餘手感亦正咗好多；音響組合亦提升至兼容MP3嘅6碟CD機頭，再加埋6個喇叭，用嚟爆機都仲得。不過，我最欣賞反而係內櫳嘅儲物設計，睇落好似暗格重重，但夠晒善用空間；貨斗入面亦加咗條紋膠面，樣靚咗亦襟用咗。
力量型夠煞食
3.0型號喺馬力同扭力輸出上，都要比2.5型號有所提升；唔使講，起步夠晒力。只係踩離合器嘅時候，明顯比記憶中小房車費勁，搞到死咗兩次火，因為以為自己已經踩咗，師傅望住C記忍住笑咁話：「梗係啦，話晒呢架都叫做小貨車呀！」收到，大力踩嘛！
揸住呢架有型小Truck喺工業邨耀武揚威，唔少地盤工人都眼望望，哈哈，未見過咁型嘅靚女呢？儍啦，講實力㗎！另外，四條胎好明顯相當咬地，快得嚟都夠晒安全，加速亦夠流暢。結論係，呢套5前速手波連本小姐都搞得掂！易揸！
貨斗不可載人
一見Ranger3.0嗰個長1,530mm嘅貨斗，肥哥哥德仔一支箭咁跳咗上去，仲好開心咁話：「我咁嘅Size都可以坐幾件啦！」德仔，你咪開心住，咁做係犯法㗎！香港法例規定貨斗只可以用嚟擺放貨物，係唔可以用嚟接載乘客；再者，貨斗入面無安全帶呢類安全設施，坐喺入面都好危險啫！
FordRanger3.0規格
引擎：2,953c.c.直4DOHC
柴油Turbo
馬力：156ps/3,200rpm
扭力：380Nm/1,800rpm
傳動：5前速手波，四輪驅動
查詢：福特香港（25031032）
