「擔番口大雪茄先！」鍾鎮濤（阿B）捱了10年，今天終於可以稍為寫意地回憶從前：「我嘅命運同香港一樣，香港好，我就好；香港冧，我一齊冧。如果當年香港經濟支持耐啲，可能我嘅人生亦會改寫。」
97回歸，金融風暴襲港，阿B的命運也跟隨大市下滑，因與前妻章小蕙炒賣豪宅，欠下裕泰興財務公司2.5億元。同年，阿B決定與移情別戀的章小蕙離婚，開始人生新一頁。
「食餐飯都計住」
黑暗之路剛起步，兒女年幼，債主臨門，朋友四散，與前妻的是非又纏繞不休，阿B說：「以前做慣star，擦開我鞋嘅竟然掉轉頭踩我，其實仲好，幫我過濾晒啲壞朋友，留番啲真心朋友喺度。」阿B終於知道何謂憂柴憂米：「真係食餐飯都要計住，朋友年年去滑雪，我就要以平價接去美加嘅job當去旅行，順便探吓喺美國讀書個仔。」他深深體會：「好運時見親都係貴人，唔好運時行出街都無端端落雨。」
千禧年，全城熱炒電訊盈科（008），阿B也有份：「真係好後悔亂咁聽人講，買咗隻8號仔，同好多香港人一齊賴嘢，蝕咗唔少錢。」連好友羅文、柯受良、黃霑、張國榮和梅艷芳都相繼離世，阿B頓悟到人生無常，更加學懂珍惜，他說：「唔係樣樣嘢都可以永遠擁有，發生咁多事，我識得appreciate對我好嘅人：家人朋友之外，畀我一世任食嘅蘭芳園茶餐廳，同埋跟咗我20幾年嘅fans，我都好珍惜。」
吃力還了五年債，解決到的只是冰山一角，阿B於02年終以破產求解脫，那一年，本港的破產個案共有25,328宗，阿B憶述：「有個的士司機同我講，話破產唔緊要，一定支持我，然後細細聲話：『我都係呀，我第三年喇。』」滿街都有「自己友」，不同的是：「人哋未必家破，又唔使面對全世界。」
低潮日子，支撐着阿B的是女友范姜和三名可愛兒女。04年小女兒鍾懿出生後，阿B的家天天洋溢歡笑聲：「呢10年最滿意嘅係生咗個細女，帶咗好多好時光畀我哋全家，我同啲仔女相處，永遠都有談戀愛嘅感覺，好冧㗎。」
去年底破產期滿，演出「溫拿33周年紀念演唱會」是阿B這10年來做得最開心的工作，後來加盟新唱片公司，還高唱《日日是好日》，他說：「財政鬆動番啲，仲有幾個內地廣告傾緊，終於回番條氣。」
「唔可以再咁懵」
珍惜好人，也要珍惜血汗錢，阿B學習理財，投資藍籌股、基金和買保險，但他的宗旨是：「做個穩陣派，安全至上，唔可以再咁懵，乜都要了解清楚先去做。」買樓呢？阿B謂首先要買一層樓來自住，再買的話就用來收租。至於炒樓，他說：「太投機嘅我唔做，五張幾嘢唔可以再跌低呀。」
一朝被蛇咬，阿B對結婚毫無憧憬，因為女兒已是他與女友最佳的承諾，談到分離10年的前妻章小蕙，他始終都是那一句：「唔講人哋。」未來10年，阿B要賺一桶金，作為家庭的儲備基金，他說：「至少要有1,000萬啦，家人陪我捱咁耐，要畀番啲安全感佢哋，等大家都有好日子過。」
撰文：蔡如玉
