隨着電視機傳來一陣熟悉的港姐音樂，佘詩曼媽媽對着剛從瑞士修讀完酒店課程後回港的女兒說：「去選港姐啦，試吓吖嘛。」攤坐沙發上的阿佘即時sayno：「唔去，衰咗咁點呀？」
沒多久，阿佘一位中學女同學又跟她說：「去選港姐啦，如果我有你咁嘅條件，我都去選呀。」於是女同學快刀斬亂麻，為她填港姐報名表格。到大會安排第一次面試前一天，女同學致電阿佘提醒她記得去面試，阿佘竟說：「我去咗旅行喎，喺歐洲。」直至第二次面試，阿佘終於捨得落機見評判，後來又戇居居上選美台，結果竟然戴上了97年港姐季軍后冠。
雞仔聲唔識做戲
這些畫面，發生於10年前。
憶起當日花樣年華選港姐，阿佘忍不住笑說：「係整定，當時女同學全部幫我搞晒，自己乜都唔識，驚輸咗唔知點去面對，嗰時仲細，唔想承受呢啲壓力。」捧獎後，阿佘便踏上拍劇征途，至去年她首奪台慶「最佳女主角」及「我最喜愛的電視女角色」，贏到開巷，威水到痹。
不過學「大契」話齋：「歡樂有時，悲傷有時，得意有時，失意有時。」阿佘都有失意時，原來初入行令她最難頂，她說：「最失意係啱啱拍劇，自己付出好多努力，我一世女都未捱過眼瞓，拍劇要捱更抵夜、日曬雨淋，一拍劇就做郭耀明老婆，係《生命有Take2》，自己拖都拍過冇幾次就做人老婆？又俾人話唔識做戲，又話我雞仔聲。
「到第二套《雪山飛狐》仲衰，係咁俾人笑，自己好似一啲天份都冇，入錯行㖭！我好冇信心，成日俾人話戲渣，嗰時想唔做㗎，諗住做番酒店業，呢個時候就接咗下一套劇，跟住一路未停過，咁就拍到𠵱家，但我又好好運，遇到好多好演員，亦都越拍越有興趣。」
去到北京冇人識
令阿佘最開心的是，憑演《金枝慾孽》打開內地市場，那種耕耘多年終有收穫的滿足感，實在難以言喻。「之前拍咗咁多劇，迴響都係話我嘅知名度係喺廣東沿岸，去到北京已經冇人識，好唔開心㗎，但到《金》劇一出街，我返內地同以前係兩回事，係好開心、好開心，感受好大。」
人生路總是不停上上落落，但阿佘上落中途都獲幸運之神眷顧，她也直認道：「我算好運，算順利。捱，個個都捱㗎啦，辛苦，個個都辛苦㗎啦，但唔係個個都好運。自己係要努力、付出，呢個世界冇不勞而獲，但運氣真係好緊要，要珍惜，識得知足，喺事業上，我至少做到一個會令我媽咪驕傲嘅女。
「贏到港姐季軍嘅感覺係輕鬆，嗰時我係一嚿飯，根本冇諗過將來；10年後，攞到兩個女主角獎，係一個好好嘅鼓勵，因為呢兩個獎唔係一朝一夕，係需要經歷同時間至有機會得番嚟，我10年無悔，冇行錯選港姐呢條路。」
撰文：朱倬誼
服裝：SistyrMoon 場地：香港富豪酒店
