10年，是一條漫漫長路！
香港回歸10年，經歷金融風暴、沙士襲擊、巨星殞落……
「漫漫前路有幾多風光，一一細心賞，為甚留步回頭望一望，心中一片迷茫。」
97年最受歡迎男歌星郭富城、我最喜愛男主角羅嘉良、香港小姐季軍佘詩曼，以及當年與前妻離婚、欠債2.5億的鍾鎮濤，回望過去種種，走過寶貴的10年，心中沒有迷茫，無論起落，帶來的只有更踏實的感覺。
馬照跑，舞照跳，歌也繼續唱下去：「漫漫前路有幾多風霜，一一去擔當，踏着前路兩家互守望，不必要怕路長！」幸好，香港始終有你！
「過去10年，我覺得每一日都係高潮迭起，冇低潮，做人一定要有咁嘅心態，先至會活得開心。」由1997年至2007年，這10年之內，曾是電視台風雲人物的羅嘉良，起過、跌過、平淡過，得出的結論居然日日有高潮。
大地在我腳下
高潮3,650日，令嘉良情緒高漲的原因，主要來自三奪無綫劇帝寶座。
話說當年仍是一嚿雲的嘉良，主唱亞視古裝劇《秦始皇》主題曲《大地在我腳下》，觀眾認聲不認人，後來這嚿雲飄去無綫，至97年憑演《難兄難弟》李奇一角首奪無綫台慶男主角大獎，從此他才扭轉星運。
回想前事，嘉良依然樂無窮，他說：「嗰年頒獎禮，對手係《刑事偵緝檔案》嘅陶大宇，大家競爭好激烈；到第二年（98年），攞獎嘅係《天地豪情》大頭文，嗰次比較輕鬆啲；第三次攞獎係02年《流金歲月》嘅丁善本，當時我冇諗過會第三次攞獎，相當驚喜，但跟住會諗往後點樣突破自己，所以決定離開無綫，我鍾意面對挑戰，遇強越強，有葉榮添（《創世紀》角色）嘅鬥心㗎。」
10年來，嘉良演繹過無數角色，《創世紀》和《先生貴性》也是他的至愛，98年他以電視藝員身份舉行兩場紅館演唱會，則屬其演藝事業另一傑作，嘉良說：「呢10年入面，我嘅演藝事業經歷豐富，喺香港同內地工作，有好多唔同體會，但機會係要自己爭取嘅。」還有他的人生，10年經歷太多了。嘉良說：「98年開完演唱會之後，隔一日就去加拿大結婚，同一個月發生兩件大事，幾難得。99年11月生仔，係我人生中成就最大嘅一件事，哈哈！到呢四年幾，我返咗內地拍劇，收穫相當大，演過中央台《鄭和下西洋》同解放軍劇《狼煙》，人生同事業都非常精采。炒車，我試過，婚變都試過，但遇到唔好嘅事都係好事，當係考驗，知道點處理，會催促成長。」
「唔好填咁多海」
十年人事幾番新，變的不止是嘉良，整個香港都一直蛻變中。作為港人一分子，他見證香港由英國殖民地移交中國後的變遷，對於香港回歸10周年，這天在山頂俯覽維港景色的嘉良笑說：「香港唔好填咁多海就好啦，其實97回歸後，特區同中國融合，越嚟越和諧，係有目共睹，希望港府可以搞多啲真正嘅福利，冇錢嘅人好多，應該撥款畀多啲醫療同綜援。」
撰文：朱倬誼 部份服裝提供：A/X
