今個星期三，股價細細，但係市值就大到得人驚嘅南海控股（680）據稱獲高盛入股，刺激股價急升16%，不過翌日高盛立即澄清，否認曾購入南海4.82%股份，其角色僅為中介人士，南海股價亦隨之跌足兩日，累積跌幅超過兩成。
據報於6月26日星期二晚，代表南海的公關公司發表新聞稿，表示高盛已於周一（25日）以每股0.29元，向南海其中一位主要股東林小春，購入33億股南海股份，涉資達9.57億元，佔南海已發行股份的4.82%。用到公關公司出新聞稿，而且有咁實在數字，報章自然照登，咁就出事。
事實上高盛呢間美資大行，雖然唔似某啲歐資行積極參與細價股買賣，但亦非無可能發生，呃晒全港報章並唔出奇。根據高盛所講，有關南海股份，是為一獨立第三者購入以製作財務產品，並非高盛或旗下管理基金的投資。簡單嚟講，有客仔要求投資銀行代發輪、期權或CB，都有可能達到以上要買貨嘅條件。
翻查呢幾日南海成交量，日日都係三甲，周四更位列榜首，成交額達到10億銀，假若「有心人」想趁機散貨，絕對可以成功達到目的。今次公關公司煞有介事出新聞稿，一方面由於涉及股份不足5%，不足以達到披露水平，另一方面，由於新聞稿唔同出通告，未經港交所（388）的存檔備份，所以無法追究其是否披露虛假資料，甚至連是誰出主意發新聞稿，亦不易追查。事件亦反映咗一個問題，究竟成日見有歐資大行買賣逾5%的股票，點分係代客揸貨或發衍生工具，抑或係真正持倉？