今日是香港回歸10周年，郭富城回顧這10年光景，他認為得多於失，最開心是97、98與01年獲無綫頒發最受歡迎男歌星獎，將其音樂事業推向高峯，但到了03年，他的事業幾乎跌至谷底。
反彈力驚人的城城，05年在紅館開騷，請得美指張叔平為其重新塑造一個光頭、戴乳環的形象，全場轟動；05和06年，城城的電影事業一樣有突破，兩奪金馬影帝，奠定其影壇地位。
「開心到失眠」
回首這10年的起跌，城城日前接受訪問說：「由97回歸到𠵱家，可以話係我嘅黃金10年，呢10年過得好有意義，喺音樂部份，我攞咗三屆無綫頒發最受歡迎男歌星獎，97年第一次攞時，真係開心到失眠，呢個獎代表住我喺樂壇去到一個新境界，但後來再攞多兩屆，音樂事業已達到指標，忽然間有啲迷惘，究竟以後條路點行呢？」
由00年開始，香港唱片市道已步入萎縮期，歌星賣碟和開演唱會已不像90年代那麼蓬勃，城城說：「02同03年可以話係我嘅事業低潮，喺別人眼中更形容我喺呢段時間已跌至谷底，講啲嘢幾難聽都有，更加睇清楚人間冷暖，但當時我冇灰心，只認為係自己嘅喘息期，畀自己好好諗吓以後條路應該點行，結果有電影公司嚟敲門，搵我演出《三岔口》，05年我就憑呢部戲攞咗金馬影帝，最想唔到第二年可以再憑《父子》蟬聯，以前對我嚟講，要攞電影獎項簡直係遙不可及，但𠵱家竟然可以一連攞兩個，真係唔知講乜好。」
不想再紮紮跳
在未來10年，城城表示會投放更多時間去演戲，因為他對演戲越來越感興趣，他說：「我已經過咗40歲，唔多適合經常喺舞台紮紮跳，但做演員嘅話，條路仲好長，好多導演成日提醒我，要學識放低自己，演戲先會夠天然，所以我已經開咗竅啦！」
撰文：葉雪
