炮製過《反斗奇兵》（ToyStory）同《怪獸公司》（MonsterInc.）嘅彼思動畫製作室同廸士尼動畫，最新嘅動畫大餐《五星級大鼠》（Ratatouille）終於出爐！今次套片再由《超人特工隊》（TheIncredibles）嘅動畫鬼才導演畢貝特（BradBird）親自主理，本來人見人怕嘅老鼠反而變成五星級大廚，令抵死惹笑嘅動畫注入高檔的飲食元素，觀眾都要好classy咁講句BonAppetit！ 撰文：戶川淳
繼06年嘅《反斗車王》（Cars）後，彼思又再搵《超人特工隊》嘅動畫鬼才導演畢貝特推出最新主菜《五星級大鼠》！套片噚日先喺美國上映，下個月2號正式喺香港上映，食正暑假黃金檔，認真信心十足。
畫師學廚
不過又好難怪佢哋，事關好多外國影評人睇過試片之後都擊節讚賞，今次電影份外惹人注目，因為《五星級大鼠》係廸士尼正式收構彼思動畫製作室後，雙方合作嘅首部動畫作品，點都全力出擊省靚招牌，為電腦動畫帶來新元素同新衝擊！
導演畢貝特上次以超人家族嘅超凡創意震驚全球，今次要引發更大想頭：人見人怕嘅坑渠老鼠「味王」，最大嘅志願竟然係成為五星級大廚，膽粗粗去到美食之都巴黎，想闖入老鼠禁地─廚房，同負責倒垃圾、唔識煮食又論論盡盡嘅廚房打雜「闊條麵」梗係搞到全城一鑊粥，炒起無數笑料！一個看似不可能實現嘅夢想旅程，結局令人意想不到！
《五》片重點係美食場面，導演同重心製作人都做咗唔少籌備工夫，佢哋先去有「美食之都」之稱嘅巴黎街上，一家接一家咁食遍當地著名頂級餐廳，返到美國仲立即為彼思動畫師安排一系列烹飪課程，等佢哋深入了解專業廚師嘅正確動作，好似點樣切菜、點樣炒嘢食，刀嘅正確揸法，以至濃湯要點樣攪，等佢哋喺製作人物嘅烹飪場面嗰陣更能掌握當中神髓。
名家相助
導演亦派員去到美國最著名餐廳FrenchLaundry搜集資料，拍下真正五星級廚房嘅運作過程，務求令戲中嘅廚房能呈現出真實廚房嘅爆炸力同生命力，連FrenchLaundry嘅總廚、美國巨星級大廚ThomasKeller亦答應親自出手幫助，為動畫師炮製不同名菜，畀佢哋拍下照片作參考資料。結果，動畫製作人一共製作咗超過270款美食，甚至當ThomasKeller看過影片後也大讚戲中美食賣相賞心悅目呢！
教你煮五星級靚湯
《五星級大鼠》除咗畫面勁揪之外，戲中老鼠仔味王做出嚟嘅美食一樣令觀眾流口水，佢能化腐朽為神奇，將垃圾變成超級正斗嘅「味王薯仔韭葱湯」，戲雖然未上，但大家都可以整定呢款靚湯嘆吓，當然唔係用垃圾材料啦！
味王薯仔韭葱湯（6人用）
材料：2個Russet靚薯仔
2大棵韭葱
4匙牛油
5杯雞湯
半杯奶油
bouquetgarni香料一包
細香葱油半杯
1/4杯碎細香葱
粗鹽及黑椒少許
做法：將韭葱去根，切成每段約1/4吋，並浸在清水中去沙。用慢火將牛油溶解，加入韭葱煮10分鐘，其間不停攪拌避免韭葱變啡。將薯仔切成一吋厚，加入韭葱之中。加入雞湯及bouquetgarni香料，慢火煮20分鐘至薯仔變軟。隔開bouquetgarni後，將湯放入攪拌機攪至滑溜，倒進另一煲子中，再加熱，之後加入奶油慢火煮2分鐘，再加入粗鹽及黑椒，上枱時灑下細香葱油及碎細香葱即成。
同場加映：廚師片陸續有來
除咗《五星級大鼠》之外，近排亦有電影以廚師做主題，又係有好多色香味俱全嘅美食喺鏡頭前出現，就係由米高德格拉斯（MichaelDouglas）個演員老婆嘉芙蓮薛達鍾斯（CatherineZeta-Jones）主演嘅《美味不設防》（NoReservations）。嘉芙蓮喺片中飾演大餐廳大廚，《陽光小小姐》（LittleMissSunshine）嘅可愛童星艾碧姬布絲蓮（AbigailBreslin）就做佢嘅姪女，套片係充滿人情味嘅浪漫愛情片，不過香港要過咗暑假至有得睇。