喺股壇同樓市都出名快狠準嘅華人置業主席劉鑾雄（大劉），佢間公司賣咗差唔多成年嘅灣仔尚翹峰，仲有過半單位未賣出，梗係想搞記者會，做吓軟硬銷咁。
噚日個記招，先搵幾個人出嚟讚吓個盤幾好，呢啲我哋見慣，冇問題。但負責賣樓嘅銷售經理任建華，一埋嚟就好似開機關槍咁，照稿讀一大段嘢，跟住影幾張相，望都唔望記者一眼就閃咗，幾乎碗公仔麵都未煮熟就蒸發，難為班公關，要託詞話佢有會開咁生硬嘅理由都搬出嚟。
華華想問，呢啲叫記者會咩？曾特首開記招讀完稿都答吓記者提問啦？唔通任生仲忙過曾特首？定係不屑見記者？一直以精英自居嘅曾特首都識反省，話要放低身段，走入人群，大叫「我要做好呢份工」！我勸呢位任生都真係要做好佢份工！
[email protected]