《危險人物》（PulpFiction）導演昆頓塔倫天奴（QuentinTarantino）同《罪惡城》（SinCity）導演羅拔洛廸格斯（RobertRodriguez）向來老友鬼鬼，經常拍戲齊齊上，佢哋兩個一人拍咗一個故事，合力炮製咗新作《Grindhouse》向70年代B級Cult片致敬，夾埋成4個鐘，不過，香港先上映羅拔嘅《索女．喪屍．機關槍》（PlanetTerror），套片真係勁血腥、勁暴力、勁搞鬼同勁好笑，完全充滿懷舊B片神髓！
今日上優先場嘅《索女．喪屍．機關槍》係羅拔洛廸格斯最玩嘢之作，羅拔從小就鍾情喪屍片，呢套片嘅劇本構思咗成10年，故事講一班邪惡軍人喺混亂中洩漏生化武器，令美國一條小鎮一夜間變成滿街喪屍，其中扮演脫衣舞孃嘅索女露絲麥高雲（RoseMcGowan），就被喪屍追到撞斷右腳，為咗求生，佢男友幫佢裝上重型機關槍當義肢，聯同城中生還者齊齊向喪屍兵團大報復。
啜核又搞笑
羅拔唔止諗出女主角右腳變殺妖機關槍嘅出位武器造型，仲放低邏輯同情理，設計咗唔少癲喪變態得來又啜核搞笑嘅場面。好似片中喪屍𡁻人𡁻到甩皮甩骨嘅場面，真係勁血腥同逼真，啲人變成爛肉喪屍嗰陣，啲特技化妝亦超核突，勁過好多經典喪屍片，但導演又能夠加入搞笑元素，令觀眾又好驚又忍唔住笑。
布斯夠搶鏡
成套片最搞嘢係導演特登將畫面搞到又花又殘，扮晒70年出品，連男女主角嘅情慾戲都玩到好有70年代B級片feel，好笑到做愛做到中途，導演玩嘢到連片都燒埋，搞到段片唔見咗，raw到爆。
羅拔當年一齣《殺出個黎明》（FromDustTillDawn）同樣大玩索女加喪屍嘅B級片橋段，仲要搵埋昆頓幫手寫劇本同客串演出，奠定兩位老友多年來合作嘅基礎，今次昆頓同布斯韋利士（BruceWillis）亦有客串，前者扮演意圖強姦女主角嘅賤格軍人，一出場已經充滿搞笑效果，之後仲冇好下場，至於布斯就扮邪惡軍團首領，佢嘅戲份都唔少，非常搶鏡。
撰文：戶川淳
話你知：Grindhouse充斥色情暴力
羅拔同昆頓塔倫天奴本身都係影癡，佢哋拍嘅電影為人津津樂道嘅地方，唔止係玩得癲喪，仲係因為喺戲內都充滿同電影有關嘅典故，好似佢哋兩個人合作嘅《Grindhouse》，片名本身已經係美國電影嘅專有名詞，指60年代後期到70年代專係唔停咁放映另類B級片嘅戲院，Grindhouse亦係指呢類戲院播映嘅電影。
Grindhouse電影就係嗰啲充斥住暴力、恐怖、怪異又或色情元素嘅低成本B級電影，好多時都係打孖一齊上映，所以兩位導演合作嘅《Grindhouse》，原意係要打孖一齊上映，不過，基於套片太長，昆頓塔倫天奴嘅《玩命．飛車．殺人狂》（DeathProof）要到下月19日先上映。