喺大學校園碰到保險C。此君乃成功人士也，多年來捐錢畀母校，資助校友、學生活動，不計其數。佢位年幼公子，已去咗加拿大升學。講起讀書，保險C話：「估唔到國際學校debenture咁值錢。最近有人問我肯唔肯賣debenture，出價三百萬，嚇咗我一驚，十幾年前L太賣畀我嗰陣，只係十六萬而已！」
三百萬買債券送仔去入讀國際學校？對左丁山嚟講，匪夷所思。李麗珊為恒生銀行賣廣告，話湊大女兒要四百萬，成為名句。如果子女一定要讀著名國際學校嘅話，四百萬怕唔夠喎！
保險C有唔少生意在新加坡，所以買咗唔少新加坡住宅單位，前星期同佢食飯之際，手提電話響起，佢一路聽一路講英文，最後猛講：「No,sorry,no.」然後收線，保險C話新加坡地產經紀查到佢間屋周時冇人住，夜晚冇開燈，於是打電話嚟問佢肯唔肯賣，願出價一千二百萬坡紙！新加坡地產市場不斷上升，豪宅尤其搶手，啲經紀連保險C嘅香港手機號碼都搵到，可謂搭通天地綫，為咗佣金，零舍搏命。
跟住見到教授C，同佢講起新加坡，教授C話不久前佢與同事到新加坡考察交流，知道新加坡政府大力撥款支持新加坡國立大學，南洋科技大學與新加坡管理大學，並且定下目標，要三間大學於十至十五年內，打入世界大學排名榜第幾位，第幾位，銀紙一於冇計，總之要搶世界一級學者到新加坡教書及研究，吸引優秀外國學生到新加坡讀書。
教授C自己仲愁緊今年大學捐款如何是好，都唔知幾羨慕新加坡國立大學啲朋友唔知個錢字點寫！咁香港咪輸晒？教授C話：「氣勢就輸晒㗎嘞，不過說來奇怪，新加坡本地學生唔知係唔係太容易搵工，做學者教授嘅比例低過香港好多，唔少香港博士去咗新加坡教書，但我哋就好少請到新加坡籍嘅博士做教授。講學術研究，目前仍然係香港多啲學生願意做，新加坡用錢買到嘅，多數係僱傭兵產品！」