向華強兒子向佐不理父母反對，堅持要在娛樂圈發展，並希望在動作明星中佔一席位，還會給自己五年時間，若做不出成績來，就聽取父母意見考慮轉行。
向華強兒子向佐在美國讀完中學，沒有繼續升讀大學，轉而在洛杉磯修讀戲劇，這個決定初時遭父母強烈反對，雙親聲明不會幫他，但他仍然堅持要殺入娛樂圈發展，最終雙親也接受他自己所選的路。
父親少提家族事
向佐是向氏家族的成員，身份背景較容易受人談論，故他希望在這方面可以盡量低調，向佐說：「對於家族嘅事我所知有限，因為由細到大，爹哋都唔想我過問咁多，其實我都係讀中學時，有同學仔問起我屋企啲嘢，自己先知家族喺江湖上嘅地位，不過爹哋好少提，而我一年都唔係有好多次可以見到大伯華炎、同阿叔華勝等長輩，不過印象中大伯好嚴肅，好細個時佢已經同我講，唔可以喺外面惹事生非，要檢點，而華勝叔就幾錫我，以前住埋同一幢大廈時，佢會同我兩兄弟一齊打機。」
替《霍元甲》做幕後
問向佐為何要入娛樂圈發展？他說：「我好細個已經對唱歌同做戲好有興趣，所以好想試吓！不過媽咪話明公司開戲只搵有價值演員，我唔係所以冇份，要喺娛樂圈發展就要靠我自己咁話喎！其實我都唔想靠屋企人，想試吓自己實力。由於我自幼習武，如果將來拍戲，我會走動作戲路為主，之前我喺李連杰嘅《霍元甲》做過幕後，後來又去過北京武術學院習武半年，希望有助以後我拍武俠片之用，我希望將來喺呢個圈有啲作為！」
採訪：陳月媚 攝影：陳俊強
