出街食飯叫條魚，就算叫條細奀嘅斑仔，起碼成嚿水至落到樓，仲要驚有雪茄毒，又怕有孔雀石綠。不過食深海魚又貴，而且都唔係度度有得食。一向做開街坊生意的威哥，就索性買起成條龍躉，實行以平價錢，等街坊都有靚魚食。
記者：梁學文
攝影：伍慶泉
Model：Habernia
街市平價入貨
成條龍躉大大條，閒閒哋都要成嚿水一斤，喺街市買少少返歸炒球，最少都要成百蚊至有交易，所以出街食會比較化算啲。不過平時去大酒樓，食碟炒龍躉球起碼$200，好貴！做開街坊生意的威哥，就推出平價食龍躉。龍躉可以平價食，因為威哥同海鮮檔熟，可以平啲攞貨。問威哥點解會做龍躉菜，佢就話：「平時出街食龍躉，淨係材料錢都貴到飛起，我自己都唔係好捨得食。有日我經過街市，見到有檔新開魚檔，見佢啲魚好靚又生猛，忍唔住買咗啲返屋企煮，發覺好食到唔停得口，於是就同魚檔傾攞貨，結果就開始研究龍躉菜。」
龍骨龍腩最滑口
一條龍躉又肥又大條，最滑最好食嘅會唔會都係面珠墩？錯，雖然龍躉的面珠墩又白又滑，不過就唔及腩位咁有口感同魚味，識食嘅會揀魚腩位。魚腩位的魚肉是全條魚最滑的部份，仲滑過面珠燉，因為近腩位有肥美的魚皮，入口滑而不膩，而且仲有一種龍躉的香味。而且龍躉魚皮含有維他命、蛋白質同鈣質，營養豐富。
6月27日直擊龍躉到埗一刻
老幹媽炒龍躉$78
辣味真係好刺激，聞到經已流晒口水好想食，再加埋老幹媽豆豉醬去炒，香味更上一層。魚肉入口先是一層香辣味道，然後滲出啖啖魚香味。要小心啲青尖椒，因為真係好辣。
泡椒炒躉腩$78
泡椒用鹽醃過，味道帶酸辣亦有些少鹹，用來炒躉腩就夠惹味。不過呢味菜的主角唔係魚，反而係墊底的鍋笋，爽口、清甜，最重要係吸收咗魚的鮮同辣椒的辣。
川味龍躉鍋$168
酸菜味道比較重，最適合唔食得辣的朋友。龍躉鍋入面仲有花椒八角同埋其他四川香料，入口感覺幾似麻辣火鍋，不過就無麻辣感覺。呢個煮法保留了魚的鮮味，可以食到龍躉的魚香。
剁椒蒸龍躉$108
龍躉起肉之後就切片，再加入蒜茸、白醋蒸，味道帶酸。師傅用上魚腩位置，入口爽口不在話下，而且肉質亦甜。
鍋巴龍躉球$78
鍋巴脆、魚肉香，加埋就係呢味鍋巴龍躉球，食的時候可以將龍躉球淋上鍋包面，又或者用鍋巴點些少魚汁食，一樣好味。魚肉入口唔會辣，仲有一陣蠔油的香味。
玉竹淮山燉龍骨$30
用上明目的杞子、玉竹、淮山同龍骨等一齊燉，淨聽名經已夠晒補。而龍骨就有助健脾補腎，多食對身體有益。
龍躉小檔案
龍躉，被評定為石斑魚類，一般大石斑多棲息在深海之中，有多個種類，色澤和花紋都不同，喺深海的就稱為龍躉。龍躉全長最少超過1米，魚鰭鋒利又大，魚身多數會帶有紅色兼有灰色，有啲龍躉魚身更有橫斑。龍躉肥美，閒閒哋都有20斤，過百斤的亦都有。
3個位最好食
食龍躉一定要識食魚腩魚骨同埋魚頭三個部份。
1.魚腩近皮位夠滑，而且有魚油煎過就會又香又爽口，用來炒就最好。
2.龍躉有返咁上下大條，魚頭魚肉都唔少，用來燜或蒸都一樣好味。
3.魚骨位特長，而且係整條魚魚味最重的位置，用來熬湯最正。
大牌檔格局夠風味
威哥的威記川味港由荃灣一路殺出大角嘴，由從前的舖頭仔，搬到𠵱家有兩間舖都唔夠做。威哥以前喺酒店的川菜館做過，跟住自己出嚟開舖，最拿手當然煮川菜，所以新店都係以川菜為主打，亦都有港式小炒的大牌檔風味。去呢度食飯，好有大牌檔Feel，當然開行冷氣唔使熱，又唔怕有蚊滋，又唔驚落雨，可以舒舒服服嘆一餐。
威記川味港（98315761）
地址：大角嘴鐵樹街46號富多來商場地下
營業時間：6pm-2am
座位：50個